ಕಾಡುಕೋಣ ಓಡಿ ಬಂದಿತ್ತಾ

ಅದ್ಯಾವುದೋ ಕೆಲಸದ ಮೇಲೆ ಹಿರೇಮನೆಗೆ ಹೊರಟಿದ್ದೆ. ನಮ್ಮ ಮನೆಯಿಂದ ಹಿರೇಮನೆಗೆ ಹೋಗಬೇಕೆಂದರೆ ಕಾಲು ದಾರಿ ಗುಡ್ಡದ ಮೂಲಕ ಸಾಗುತ್ತದೆ. ಬೈಕ್ ಒಯ್ಯಲು ಬಳಸುದಾರಿಯನ್ನೇ ಬಳಸಬೇಕು. ನಮ್ಮ ಮನೆಯ ಹಿಂದಿನ ಸಣ್ಣ ಗುಡ್ಡ ಏರಿ ನಂತರ ಒಂದು ಫರ್ಲಾಂಗ್ ಇಳಿದರೆ ಹಿರೇಮನೆ. ಮನೆಯಿಂದ ಅದ್ಯಾವುದೋ ಆಲೋಚನೆ ಮಾಡುತ್ತಾ ಸಣ್ಣ ಗುಡ್ದ ಏರಿ ಇಳಿಯಲು ಆರಂಬಿಸಿದ್ದ. ರಸ್ತೆ ಪಕ್ಕದ ಅಗಳ(ಕಾಲುವೆ) ದಿಂದ ಒಮ್ಮೆಲೆ ಸುಟಿಲ್ ಎಂಬ ಶಬ್ಧದೊಡನೆ ಏನೋ ಕಪ್ಪಗೆ ನನ್ನೆಡೆ ನುಗ್ಗಿದಂತಾಯಿತು. ತಲೆ ಎತ್ತಿ ನೋಡಿದರೆ ಬೃಹತ್ ಗಾತ್ರದ ಕಾಡುಕೋಣ ಅಗಳದ ಒಳಗಿನಿಂದ ಬುಸ್ ಎನ್ನುತ್ತಾ ನನ್ನತ್ತ ಬರುತ್ತಿತ್ತು. ತಡಬಡ ಮಾಡಲಿಲ್ಲ ಹತ್ತಿರದಲ್ಲಿದ್ದ ಒಂದು ಗೇರುಮರವನ್ನು ಅದ್ಯಾಯ ಮಾಯೆಯಲ್ಲಿಯೋ ಛಂಗನೆ ಏರಿ ಕುಳಿತೆ. ಗಡಿಬಿಡಿಯಲ್ಲಿ ನಾನು ಗೇರುಮರದ ಅತ್ಯಂತ ಸಪೂರ ಹೆರೆಯನ್ನು ಏರಿದ್ದೆ. ಹಾಗಾಗಿ ಏರಿದ ಮರುಕ್ಷಣದಲ್ಲಿಯೇ ಗಾಡ್ಸ್ ಮಸ್ಟ್ ಬಿ ಕ್ರೇಝಿ ಸಿನೆಮಾದ ಹೀರೋವಿನಂತೆ ಗೇರುಮರದ ಹೆರೆ ಸಮೇತ ಮತ್ತೆ ಭೂಮಿಯ ಮೆಲೆ ಬಂದು ನಿಂತಿದ್ದೆ. ನನ್ನಿಂದ ಐದು ಅಡಿ ದೂರದಲ್ಲಿ ಕಾಡುಕೋಣ ಮಾಡುವುದೇನು ಅಂತ ಅರ್ಥ ಆಗಲಿಲ್ಲ. ಹಿಂದೆ ಬಚ್ಚಗಾರು ದೇವಸ್ಥಾನದ ಭಟ್ಟರನ್ನು ಹಾಯ್ದು ನುಜ್ಜುಗುಜ್ಜು ಮಾಡಿದ್ದು ಆ ಕ್ಷಣದಲ್ಲಿಯೂ ನೆನಪಾಯಿತು. ತಕ್ಷಣ ಗುಡ್ಡ ಹತ್ತಿ ಓಡ ತೊಡಗಿದೆ. ಸುಮಾರು ನೂರು ಅಡಿ ದೂರ ನಿಂತು ಕೋಣನತ್ತ ತಿರುಗಿ ನೋಡಿದೆ. ಕೋಣ ಅಲ್ಲಿಯೇ ಇದೆ. ಆದರೆ ಬುಸುಗುಟ್ಟುವುದು ಮಾತ್ರಾ ನಿಂತಿಲ್ಲ. ಈಗ ಸ್ವಲ್ಪ ಧೈರ್ಯ ಬಂತು. ನಿದಾನ ಹೆಜ್ಜೆಯ ಮೇಲೆ ಹೆಜ್ಜೆಯ ನಿಡುತ್ತಾ ಹತ್ತಿರ ಹೋದೆ. ಇಲ್ಲ ಕಾಡು ಕೋಣ ಬುಸುಗುಡುತ್ತದೆ ಹೊರತು ಮುಂದೆ ಬರುವುದಿಲ್ಲ. ಅಲ್ಲಿಗೆ ಅದು ನನ್ನಮೇಲೆ ಧಾಳಿ ಮಾಡಲು ಬರುತ್ತಿಲ್ಲ ಅಂತ ಮನವರಿಕೆಯಾಯಿತು. ಹುಯ್ ಹುಯ್ ಎಂದೆ . ಆದರೂ ಮುಂದೆ ಬರುತ್ತಿಲ್ಲ. ಇನ್ನೂ ಹತ್ತಿರ ಹೋಗಿನೋಡಿದಾಗ ಕೋಣ ಕಂದಕದಲ್ಲಿ ಸಿಕ್ಕು ಮೇಲೆಬರಲಾರದೆ ಬುಸ್ ಗುಡುತ್ತಿತ್ತು. ನಾನು ಅದು ನನ್ನನ್ನು ಗುರಿಯಾಗಿಸಿಕೊಂಡಿದೆ ಎಂದು ತಪ್ಪು ತಿಳಿದುಕೊಂಡಿದ್ದೆ. ಈಗ ನೂರಕ್ಕೆ ನೂರು ಧೈರ್ಯ ಬಂತಾದರೂ ಕೋಣವನ್ನು ಕಂದಕದಿಂದ ಮೇಲೆತ್ತುವ ಕಾರ್ಯಾಚರಣೆಗೆ ಮನಸ್ಸು ಮಾಡಲಿಲ್ಲ ಕಾರಣ ಮುಂದಿನ ಎರಡನೆ ಕ್ಲಾಸಿನ ಪಾಠದಲ್ಲಿ ಹುಲಿಯನ್ನು ಬೋನಿನಿಂದ ಬಿಡಿಸಿದ ಬ್ರಾಹ್ಮಣನ ಕತೆಯ ಬದಲು ಕಾಡುಕೋಣನನ್ನು ಬಿಡಿಸಿದ ಬ್ರಾಹ್ಮಣ ಎಂದು ಒಂದು ಪಾಠವನ್ನಿಡಲು ಣಾನು ಕಾರಣನಾಗುತ್ತೇನೆ ಆಂತ ಅನ್ನಿಸಿತು. ಆ ಬ್ರಾಹ್ಮಣನ ಸಹಾಯಕ್ಕೆ ನರಿ ಇತ್ತು ಈ ಬ್ರಾಹ್ಮಣನಿಗೆ ನರಿ ಬರುವುದಿರಲಿ ನರಿ ಬುದ್ದಿಯ ಜನರನ್ನು ಹುಡುಕಲೂ ಊರಿಗೆ ಹೋಗಬೇಕಲ್ಲ. ಎಂದು ಆಲೋಚಿಸುತ್ತಾ ಹಿರೇಮನೆ ಪ್ರೋಗ್ರಾಂ ಕ್ಯಾನ್ಸಲ್ ಮಾಡಿ. ವಾಪಾಸು ಮನೆಗೆ ನಡೆದೆ.

ಈ ಘಟನೆ ನಡೆದು ಇಪ್ಪತ್ತು ವರ್ಷಗಳು ಸಂದವು. ಇವತ್ತು ಕಂಪ್ಯೂಟರ್ ನಲ್ಲಿ ಯಾವಾಗಲೋ ತೆಗೆದ ಕಾಡುಕೋಣನ ಫೊಟೋ ಕಾಣಿಸಿತು ಮತ್ತು ವೃಥಾ ಹೆದರಿದ್ದು ನೆನಪಾಯಿತು. ಜೀವನವೆಂದರೆ ಹಾಗೆ ನಾವು ಸುಮ್ಮನೆ ಹಲವಾರು ಕಾರಣಗಳಿಗೆ ಹೆದರುತ್ತೇವೆ. ಅವರು ಬದುಕಲು ಹೋರಾಟ ನಡೆಸುತ್ತಿರುತ್ತಾರೆ ಅಷ್ಟೆ ಅದು ನಮಗೆ ಹೆದರಿಕೆಯಾದರೆ ಕಷ್ಟ, ನೋಡಲು ನಿಂತರೆ ಸುಖ.

(ಮುಕ್ತಾಯ: ಸಂಜೆ ಹೋಗಿ ನೋಡಿದಾಗ ಕಾಡುಕೋಣ ತನ್ನಷ್ಟಕ್ಕೆ ಹೊರಟುಹೋಗಿತ್ತು.)

ಪಂಚಕುತಂತ್ರದ ಅನೀತಿ ಕತೆಗಳು

ಅಡಿಕೆ ಚೀಲ
ಒಂದಾನೊಂದು ಊರಿನಲ್ಲಿ ಶ್ಯಾಮಯ್ಯ ಎನ್ನುವ ಗ್ರಹಸ್ಥನಿದ್ದನು. ಆತ ಊರಿನ ದೇವಸ್ಥಾನದ ಪಕ್ಕದಲ್ಲಿಯೇ ಮನೆ ಮಾಡಿಕೊಂಡು ಹೆಂಡತಿ ಮಕ್ಕಳೊಡನೆ ಸುಖವಾಗಿ ಕಾಲ ಕಳೆಯುತ್ತಿದ್ದನು. ಒಂದು ದಿವಸ ಅವನಿಗೆ ಎರಡು ಸಾವಿರ ರೂಪಾಯಿಯ ಅಗತ್ಯ ಬಿತ್ತು. ಊರಿನವರ್ಯಾರು ಅವನಿಗೆ ಹಣಕೊಡಲು ಮುಂದೆಬರಲಿಲ್ಲ. ಆ ಸಂದರ್ಭದಲ್ಲಿ ಭಕ್ತರೊಬ್ಬರು ದೇವರ ಹರಕೆ ತೀರಿಸಲು ದೇವಸ್ಥಾನಕ್ಕೆ ಬಂದರು, ಅವರ ಬಳಿ ಶ್ಯಾಮಯ್ಯ ಬಣ್ಣ ಬಣ್ಣದ ಮಾತನಾಡಿ ಎರಡುಸಾವಿರ ರೂಪಾಯಿ ದೇವರಿಗೆ ಅರ್ಪಿಸಿದರೆ ಸುಖವಾಗಿ ಬಾಳಬಹುದು ಎಂದು ನಂಬಿಸಿದನು. ಅವರು ಒಪ್ಪಿ ಹುಂಡಿಗೆ ಹಣ ಹಾಕಲು ಹೋದಾಗ ನಾನೇ ದೇವರಿಗೆ ಅರ್ಪಿಸುತ್ತೇನೆ ಎಂದು ಹಣ ಇಸಿದುಕೊಂಡು ಗುಳುಂ ಸ್ವಾಹಾ ಮಾಡಿಬಿಟ್ಟನು.
ಒಂದು ವಾರದ ನಂತರ ಶ್ಯಾಮಯ್ಯನಿಗೆ ಇದ್ದಕ್ಕಿದ್ದಂತೆ ಎದೆನೋವು ಕಾಣಿಸಿಕೊಂಡಿತು. ಅಲ್ಲಿಯವರೆಗೆ ಕಂಡದ್ದನ್ನೆಲ್ಲಾ ತಿಂದು ದಕ್ಕಿಸಿಕೊಂಡದ್ದ ಶ್ಯಾಮಯ್ಯನಿಗೆ ಹೆದರಿಕೆ ಪ್ರಾರಂಭವಾಯಿತು. ಈ ಎದೆ ನೋವು ಹೀಗೆ ದಿಡೀರನೆ ಬರಲು ತಾನು ಎರಡು ಸಾವಿರ ದೇವರ ಹಣ ತಿಂದದ್ದೇ ಕಾರಣವಿರಬಹುದೇ ಎಂಬ ಭಯ ಹೆಜ್ಜೆಹೆಜ್ಜೆಗೂ ಕಾಡಿ ಅಂತಿಮವಾಗಿ ದೇವರ ಶಕ್ತಿಗೆ ಮನಸೋತು "ಅಯ್ಯಾ ಭಗವಂತ ನಿನ್ನ ದುಡ್ಡು ತಿಂದು ತಪ್ಪು ಮಾಡಿಬಿಟ್ಟೆ, ಪ್ರಾಯಶ್ಚಿತ್ತವಾಗಿ ಒಂದು ಚೀಲ ಅಡಿಕೆಯನ್ನು ಅರ್ಪಿಸುತ್ತೇನೆ ನನ್ನ ತಪ್ಪು ಮನ್ನಿಸು" ಎಂತ ಬೋರಲಿಟ್ಟನು. ಅದ್ಯಾವ ಮಾಯವೋ ಮಂತ್ರವೋ ಮಹಿಮೆಯೋ ಅಂತೂ ಕ್ಷಣಮಾತ್ರದಲ್ಲಿ ಶ್ಯಾಮಯ್ಯನ ಎದೆನೋವು ಮಾಯವಾಯಿತು.
ಎರಡು ಮೂರು ದಿನದ ನಂತರ ಅಡಿಕೆಚೀಲದ ಹರಕೆ ನೆನಪಾಯಿತು. ಆದರೆ ಎದೆನೋವು ಮಾಯವಾದ್ದರಿಂದ ಈಗ ಒಂದುಚೀಲ ಅಡಿಕೆ ಕೊಡಲು ಮನಸ್ಸು ಒಪ್ಪಲಿಲ್ಲ. ಆರೋಗ್ಯವಂತ ದೇಹ ಮನಸ್ಸು ಸುಮ್ಮನೆ ಹತ್ತುಸಾವಿರ ರೂಪಾಯಿ ಗಂಟನ್ನು ದೇವರಿಗೆ ಒಪ್ಪಿಸಲು ಹೇಗೆ ಪರವಾನಿಗೆ ಕೊಡುತ್ತೆ? ಹಾಗಾಗಿ ಪ್ರಪಂಚವನ್ನೇ ನಡೆಸುವ ದೇವರಿಗೆ ಪುಟಗೋಸಿ ನನ್ನ ಅಡಿಕೆ ಯಾವ ಲೆಕ್ಕ. ಬೇಕಾದರೆ ಅವನೇ ಕ್ಷಣ ಮಾತ್ರದಲ್ಲಿ ಸೃಷ್ಟಿಸಿಕೊಳ್ಳಬಲ್ಲ ಎಂಬಂತಹ ಆಲೋಚನೆಗಳು ಮುತ್ತತೊಡಗಿದವು. ಆದರೆ ಹರಕೆ ತೀರಿಸದಿರಲು ಮನಸ್ಸು ಒಪ್ಪಲಿಲ್ಲ. ಆವಾಗ ಮತ್ತೊಂದು ಉಪಾಯ ಹೊಳೆಯಿತು. ಒಂದು ಕರವಸ್ತ್ರವನ್ನು ಎರಡು ಮಡಚಿಗೆ ಮಾಡಿ ಹೊಲಿಗೆ ಹಾಕಿದನು. ಅದಕ್ಕೊಂದು ತೊಟ್ಟನ್ನು ಇಟ್ಟು ಮಗನನ್ನು ಕರೆದು ಇದು ಏನು? ಎಂದು ಕೇಳಿದನು. ಮಗ ಇದು ಚೀಲ. ಎಂದು ಉತ್ತರಿಸಿದನು. ಮಕ್ಕಳು ದೇವರ ಸಮಾನ ಹಾಗಾಗಿ ದೇವರೆ ಇದನ್ನು ಚೀಲ ಎಂದು ಹೇಳಿದಂತಾಯಿತು ಎಂಬ ತೀರ್ಮಾನಕ್ಕೆ ಬಂದ ಶ್ಯಾಮಯ್ಯ ಅದರ ತುಂಬಾ ಒಂದು ಮುಷ್ಠಿ ಅಡಿಕೆ ತುಂಬಿ ದೇವಸ್ಥಾನಕ್ಕೆ ಹೋಗಿ ದೇವರ ಎದುರು ನಿಂತು," ಭಗವಂತಾ ನನ್ನ ಹರಕೆಯನ್ನು ಮನ್ನಿಸಿ ಎದೆನೋವು ಮಾಯಮಾಡಿದೆ, ಮಾತಿಗೆ ನಾನು ತಪ್ಪುವ ಜಾಯಮಾನ ನನ್ನದಲ್ಲ ನನ್ನ ಮನೆತನದ್ದೂ ಅಲ್ಲ ಇದೋ ಅಡಿಕೆ ತುಂಬಿದ ಚೀಲವನ್ನು ಒಪ್ಪಿಸಿಕೋ" ಎಂದು ಕೈಮುಗಿದನು.
ಮಾತಿನಂತೆ ನಡೆದ ಶ್ಯಾಮಯನನ್ನು ನೋಡಿದ ದೇವರು ಸ್ಥಂಭೀಭೂತ..! ನಾದನು. ದೇವಸ್ಥಾನದ ಗಂಟೆಗಳು ತಮಿಳು ಸಿನೆಮಾದಲ್ಲಿ ತೂಗಾಡುವಂತೆ ಡಣ ಡಣ ಎಂದು ಹೊಡೆದುಕೊಳ್ಳುತ್ತಾ ತೂಗಾಡತೊಡಗಿದವು.
ಅನೀತಿ: ಬುದ್ಧಿಯಿದ್ದರೆ ದೇವರಿಗೂ ಬುದ್ಧಿ ಕಲಿಸಬಹುದು.
ಬುಡಕ್ಕೆ ಬಂದಾಗ
ಒಂದು ಊರಿನಲ್ಲಿ ರಾಮಯ್ಯನೆಂಬ ಗೃಹಸ್ಥನಿದ್ದನು. ಅವನು ಬೆಳೆಯುತ್ತಾ ಬೆಳೆಯುತ್ತಾ ದೊಡ್ಡವನಾದನು..!. ಅವನಿಗೆ ತನ್ನನ್ನು ಊರಿನಲ್ಲಿ ಯಾರೂ ಗುರುತಿಸುತ್ತಿಲ್ಲ ಎಂಬ ಭಾವನೆ ಇತ್ತು. ಹಾಗಾಗಿ ಜನರ ನಡುವೆ ತಾನು ಗುರುತಿಸಿಕೊಳ್ಳುವ ಸಲುವಾಗಿ ತಕರಾರು ತೆಗೆಯುವ ಸ್ವಭಾವವನ್ನು ಮೈಗೂಡಿಸಿಕೊಂಡನು. ದೇವಸ್ಥಾನದಲ್ಲಿ ತಕರಾರು, ಸಂಘದಲ್ಲಿ ತಕರಾರು, ರಾಜಕೀಯದಲ್ಲಿ ತಕರಾರು ಹೀಗೆ ಯಾರು ಏನೇ ಮಾಡಿದರೂ ಅದರ ವಿರುದ್ದ ತಕರಾರೆತ್ತಿ ಗುರುತಿಸಿಕೊಳ್ಳತೊಡಗಿದನು. ಅವನ ಊರಿಗೆ ಒಮ್ಮೆ ಗುರುಗಳೊಬ್ಬರ ಆಗಮನವಾಯಿತು. ಊರವರೆಲ್ಲಾ ಸೇರಿ ಗುರುಗಳಿಗೆ ಪಾದಪೂಜೆ ಮಾಡಬೇಕೆಂದು ತೀರ್ಮಾನಿಸಿ ಯಜಮಾನನೊಬ್ಬನನ್ನು ನಿಯಮಿಸಿದರು. ಆಗ ರಾಮಯ್ಯನನ್ನು ಯಾರೂ ಕೇಳಲಿಲ್ಲ. ರಾತ್ರಿ ಪೂರ್ತಿ ಕಣ್ಣು ಕೆಂಪಗೆ ಮಾಡಿಕೊಂಡು ರಾಮಯ್ಯ ತನ್ನ ಸಹವರ್ತಿಗಳ ಜತೆ ಪ್ರತಿಭಟನೆಯಲ್ಲಿ ತೊಡಗಿದನು. ಭಕ್ತರ್ಯಾರೂ ಕ್ಯಾರೇ? ಎನ್ನದಿದ್ದ ಪರಿಣಾಮವಾಗಿ ರಾಮಯ್ಯ ಇನ್ನಷ್ಟು ಕೆರಳಿ ಕೆಂಡವಾಗಿ ಗುರುಗಳು ಜಾತಿವಾದಿಗಳು ಮನುಷ್ಯರೆಲ್ಲಾ ಒಂದೇ ಜಾತಿ ಎಲ್ಲರ ಮೈಯಲ್ಲಿ ಒಸರುವುದೂ ಕೆಂಪು ರಕ್ತವೇ ಹಾಗಾಗಿ ಗುರುಗಳನ್ನು ದೂರವಿಡಿ ಎಂದು ಪಟಾಲಂ ಜತೆಗೂಡಿ ನಿತ್ಯ ಮೀಟಿಂಗ್ ಮಾಡತೊಡಗಿದನು. ಮೀಟಿಂಗ್ ನಲ್ಲಿ ಈಟಿಂಗ್ ಹಾಗೂ ಡ್ರಿಂಕಿಂಗ್ ಖರ್ಚು ರಾಮಯ್ಯನೇ ವಹಿಸಿಕೊಳ್ಳುತ್ತಿದ್ದುರಿಂದ ಹತ್ತೆಂಟು ಜನರ ಜತೆ ರಾಮಯ್ಯನಿಗೆ ಯಾವಾಗಲೂ ಇರುತ್ತಿತ್ತು. ಈ ನಡುವೆ ರಾಮಯ್ಯನ ತಂಗಿಯ ಮದುವೆ ನಡೆಯಿತು. ಆಕೆಯ ಗಂಡ ಗುರುಗಳ ಪರಮ ಭಕ್ತ. ಇದರಿಂದ ಸಿಟಗೊಂಡ ರಾಮಯ್ಯ ತಂಗಿಯ ಬಳಿ." ನೀನು ನನ್ನ ಮನೆಯ ಹೊಸ್ತಿಲು ತುಳಿಯಬೇಡ, ತವರುಮನೆ ನಿನಗೆ ಬಾಗಿಲು ಮುಚ್ಚಿದೆ" ಎಂದನು.
ವರ್ಷಗಳು ಸಂದವು ಗುರುಗಳ ವಿರುದ್ಧ ಪ್ರತಿಭಟನೆಗೆ ಯಾವ ಪ್ರತಿಕ್ರಿಯೆಯೂ ಸಿಗಲಿಲ್ಲ. ದಿನ ದಿನಕ್ಕೆ ಪಟಾಲಂ ಕರಗತೊಡಗಿತು. ಈ ನಡುವೆ ರಾಮಯ್ಯನ ಮಗಳು ಬೆಳೆದು ದೊಡ್ಡವಳಾದಳು. ಪ್ರಾಯಕ್ಕೆ ಬಂದ ಹೆಣ್ಣನ್ನು ಮದುವೆಯಾಗಲು ಆಗರ್ಭ ಶ್ರೀಮಂತರೊಬ್ಬರು ಮುಂದೆ ಬಂದರು. ರಾಮಯ್ಯ ಸಂತೋಷದಿಂದ ಮದುವೆ ಮಾಡಿಕೊಟ್ಟನು. ರಾಮಯ್ಯನ ಅಳಿಯ ಮಗಳೊಡನೆ ಅದೇ ಗುರುಗಳನ್ನು ಮನೆಗೆ ಕರೆಯಿಸಿ ಪಾದಪೂಜೆ ಭಿಕ್ಷಾ ಕಾರ್ಯಕ್ರಮ ಏರ್ಪಡಿಸಿದನು. ರಾಮಯ್ಯ ನಗುನಗುತ್ತಾ ಕಾರ್ಯಕ್ರಮದಲ್ಲಿ ಪಾಲ್ಗೊಂಡನು.
"ಮತ್ತೆ ಗುರುಗಳು ಜಾತಿವಾದಿಗಳು, ಮನುಷ್ಯರಲ್ಲಿ ಜಾತಿ ಎಂಬುದಿಲ್ಲ ಎಲ್ಲರ ರಕ್ತದ ಬಣ್ಣವೂ ಕೆಂಪು ಹಾಗಾಗಿ ಎಲ್ಲಾ ಒಂದೇ ಅಂದಿದ್ದೆಯೆಲ್ಲಾ " ಎಂದು ಊರಿನವರೊಬ್ಬರು ಕೇಳಿದರು
" ಅಯ್ಯಾ ಮಂಕೇ ನಿಮ್ಮ ಕಣ್ಣಿಗೆ ರಕ್ತ ಕೆಂಪಗೆ ಕಾಣಿಸುತ್ತದೆಯಷ್ಟೆ, ಅದರಲ್ಲಿ ಎ,ಬಿ,ಒ ಮುಂತಾದ ಗುಂಪುಗಳಿವೆ. ಅವು ನಿಮ್ಮಂತಹ ಮಾಮೂಲಿ ಜನರ ಬರಿಗಣ್ಣಿಗೆ ಕಾಣದು. ಅದಕ್ಕೆ ಗುರುಗಳೆಂಬ ಲ್ಯಾಬ್ ಗೆ ಹೋದಾಗ ಗೋಚರಿಸುತ್ತದೆ. ಹಾಗಾಗಿ ಮನುಷ್ಯರಲ್ಲಿ ಖಂಡಿತಾ ಜಾತಿಗಳಿವೆ, ಅದು ಜ್ಞಾನಿಗಳಿಗೆ ಮಾತ್ರಾ ಗೋಚರಿಸುತ್ತೆ. ನಿಮ್ಮಂತಹ ಸಾಮಾನ್ಯ ಜನರಿಗಲ್ಲ." ಎಂದು ಹೇಳಿ ಮಂತ್ರಾಕ್ಷತೆ ಕಣ್ಣಿಗೊತ್ತಿಕೊಂಡನು. ಆವಾಗಲೂ ಗುರುಮಠದ ಗಂಟೆ ಡಣ ಡಣ ಎಂದು ಕನ್ನಡ ಸಿನೆಮಾದಲ್ಲಿ ಓಲಾಡಿದಂತೆ ಓಲಾಡಿ ಶಭ್ದ ಮಾಡಿತು. ಅದರ ನಡುವೆ ಕರ ಕರ ಶಬ್ಧವೂ ಕೇಳಿತು. ಬಹುಶಃ ಒಂದು ಗಂಟೆಗೆ ಮರದ ಕೋಲು ಹಾಕಿದ್ದಿರಬೇಕು.
ಅನೀತಿ: ಕು.ಬುದ್ದಿ ಸೋಲನ್ನೂ ಗೆಲುವನ್ನಾಗಿ ಪರಿವರ್ತಿಸುತ್ತದೆ.
ಮಾತೃದೇವೋ ಭವ
ಓಂದು ಊರಿನಲ್ಲಿ ಶಿವಯ್ಯ ಘನಂದಾರಿ ಪುರೋಹಿತರಿದ್ದರು. ಅವರು ನಿಯಮ ನಿಷ್ಟೆಗಳಲ್ಲಿ ಪ್ರಖ್ಯಾತರಾಗಿದ್ದರು. ಧಾರ್ಮಿಕ ಕಾರ್ಯಕ್ರಮಗಳನ್ನು ಮುಗಿಸಿದ ನಂತರ ಉತ್ತಮ ಉಪನ್ಯಾಸ ನೀಡುತ್ತಿದ್ದರು. ಒಂದು ದಿನ ಊರಿನ ಗೃಹಸ್ಥನ ಮನೆಯಲ್ಲಿ ಮಾತೆಯೊಬ್ಬರ ಪತಂಗ ಕಾರ್ಯಕ್ರಮಕ್ಕೆ ಅವರನ್ನು ಆಹ್ವಾನಿಸಿದ್ದರು. ಫಲಮಂತ್ರಾಕ್ಷತೆಯ ನಂತರ ಪುರೋಹಿತ ಶಿವಯ್ಯರ ಬಳಿ ಆಶೀರ್ವಾಚನ ಮಾಡಿರೆಂದು ಮನೆಯವರು ಕೇಳಿಕೊಂಡರು. ಆಗ ಶಿವಯ್ಯನವರು ಗಂಟಲು ಸರಿ ಮಾಡಿಕೊಂಡು " ನಮ್ಮ ಹಿಂದೂ ಧರ್ಮದಲ್ಲಿ ತಾಯಿ ಎಂದರೆ ದೇವರ ಸಮಾನ, ತಾಯಿಗಿಂತ ಮಿಗಿಲಾದ ದೇವರಿಲ್ಲ. ಆಕೆ ನಮ್ಮನ್ನು ಹೊತ್ತು ಹೆತ್ತು ಸಾಕಿ ಸಲಹಿ ಬೆಳಸುತ್ತಾಳೆ. ಆದ್ದರಿಂದಲೇ ವೇದ "ಮಾತೄ ದೇವೋ ಭವ" ಎಂದಿದೆ. ಆಕೆಯ ಮನಸ್ಸು ಮಕ್ಕಳ ಜೀವನಕ್ಕಾಗಿ ಮಿಡಿಯುತ್ತಿರುತ್ತದೆ. ಆಕೆಯನ್ನು ಮನಸಾರೆ ಪ್ರೀತಿಸಬೇಕು. ಆಕೆಗೆ ಕೆಟ್ಟ ಮಾತನ್ನು ಹೇಳಬಾರದು. ಪ್ರತ್ಯಕ್ಷ ನಡೆದಾಡುವ ದೇವತೆ ಎಂದರೆ ಮಾತೆ. ಆಕೆಯನ್ನು ಪೂಜಿಸಿದರೆ ಸಕಲ ದೇವತೆಗಳನ್ನೂ ಪೂಜಿಸಿದಂತೆ. ಹಾಗೇಯೇ ಇಂತಹ ಸಂದರ್ಭಗಳಲ್ಲಿ ದಾನ ಧರ್ಮಗಳನ್ನು ಹೆಚ್ಚು ಮಾಡಿ ಸಂತುಷ್ಟಗೊಳಿಸಿದರೆ ಅದು ತಾಯಿಗೆ ನಮಿಸಿದಂತೆ............." ಹೀಗೆ ಅರ್ದ ಗಂಟೆಯ ಶಿವಯ್ಯನವರ ಆಶೀರ್ವಚನವನ್ನು ಸೇರಿದ್ದ ಜನತೆ ಆಸ್ವಾದಿಸಿ ತಲೆದೂಗಿತು. ಎಂಥಹಾ ಪಂಡಿತರಪ್ಪಾ ನಿಜವಾಗಿಯೂ ಪೂಜ್ಯರು ಎಂದಿತು. ಕಾರ್ಯಕ್ರಮ ಮುಗಿಸಿ ಎಲ್ಲರೂ ಅವರವರ ಮನೆಗೆ ಹೊರಟರು.
ಶಿವಯ್ಯನವರು ಅಕ್ಕಿ ಗಂಟಿನೊಂದಿಗೆ ಮನೆಗೆ ಬಂದರು. ಜಗುಲಿಯಲ್ಲೆ ಒಂದಿಷ್ಟು ಅಕ್ಕಿ ಕಾಯಿ ರಾಶಿ ಬಿದ್ದಿತ್ತು. ಅದನ್ನು ಕಂಡ ಶಿವಯ್ಯನವರು ಕೆಂಡಾಮಂಡಲರಾಗಿ ಹೆಂಡತಿಯನ್ನು ಕೂಗಿ ಕರೆದು " ಇದೇನು ನಿನಗೆ ಸ್ವಲ್ಪ ಜವಾಬ್ದಾರಿ ಇದೆಯಾ ಈ ತರ ಅಕ್ಕಿ ಕಾಯಿ ರಾಶಿ ಹಾಕಿದ್ದೀಯಲ್ಲ, ಇರುವೆ ಬಂದು ತಿಂದು ಹೋದರೆ ನಾನು ತಂದು ಹಾಕುವವ ಇದ್ದೀನೆ ಅಂತ ನಿನಗೆ ಅಸಡ್ಡೆ" ಎಂದರು. ಆಗ ಹೆಂಡತಿ " ಅದು ನಾ ಮಾಡಿದ್ದಲ್ಲ, ನನ್ನ ಮೇಲೆ ಹಾರಾಡುವುದು ಬೇಡ, ನಿಮ್ಮ ಮ್ಮ ಮುದ್ಕಿ ಇದಾಳಲ್ಲ ಅವಳ ಕೆಲಸ" ಎಂದಳು. ಹೆಂಡತಿ ಹಾಗಂದಿದ್ದೇ ಶಿವಯ್ಯ ನವರ ಧ್ವನಿ " ಅಮ್ಮಾ .. ಅಮ್ಮಾ ನಿಂಗೆ ತಲೆ ಇದೆಯಾ...? ಇವತ್ತಿನ ಕಾಲದಲ್ಲಿ ದುಡಿಯೋದು ಎಷ್ಟು ಕಷ್ಟ ಅಂತ ಕೂತು ತಿನ್ನುವ ನಿನಗೆ ಏನು ಗೊತ್ತು? . ಆ ಭಗವಂತ ನಿಮ್ಗೆಲ್ಲಾ ಆಯುಷ್ಯಾನು ಜಾಸ್ತಿ ಕೊಟ್ಟೀರ್ತಾನೆ......" ಐದು ನಿಮಿಷಗಳ ಕಾಲ ಮಾತೃದೇವೋ ಭವದ ಪೂಜೆಯನ್ನು ಶಿವಯ್ಯನವರು ಮಾಡಿದರು. ಈ ಸಂದರ್ಭದಲ್ಲಿಯೂ ಮನೆ ದೇವರ ಗಂಟೆ ತೆಲಗು ಸಿನಿಮಾದಲ್ಲಿ ಓಲಾಡುವಂತೆ ಓಲಾಡಿ ಶಬ್ದ ಮಾಡಿತು. ಆದರೆ ಗಂಟೆ ಸಣ್ಣದಾದ್ದರಿಂದ ಶಬ್ಧ ಜೋರಾಗಿ ಕೇಳಲಿಲ್ಲ.
ಅನೀತಿ: ಬುದ್ಧಿ ಉಪಯೋಗಿಸಿದರೆ ಗಂಟೆ ಗಂಟೆಗೆ ಸ್ವಭಾವ ಬದಲಿಸಬಹುದು.
ಈ ಮೇಲಿನ ಪಂಚಕುತಂತ್ರದ ಮೂರು ಕತೆಗಳನ್ನು ನೀವುಗಳು ಈಗಾಗಲೆ ಕೇಳಿದ್ದರೆ ನಾನು ಜವಾಬ್ದಾರನಲ್ಲ.......! - ಆರ್ಶ

ಹೃದಯದ ಮಾತು ಮತ್ತು ಓಶೋ ಎಂಬ ಸಂತ ..ಹಾಗೂ ಬಿಟ್ಟಾಕು..... ಬಿಟ್ಟಾಕು ....ಬಿಟ್ಟಾಕು

ಆ ಕಣ್ಣುಗಳಲ್ಲಿ ಅದೆಂತಹಾ ಭಾವ, ಆ ಮುಖದಲ್ಲಿ ಅದೆಂತದೋ ಶಕ್ತಿ ಆ ನೋಟದಲ್ಲಿ ಉನ್ಮಾದ ಎಂಬಂತಹ ಡೈಲಾಗ್ ಗಳನ್ನು ಬದಿಗಿರಿಸಿ ಓಶೋವನ್ನು ನೋಡೋಣ. ಎಲ್ಲ ಸಂತ ಸನ್ಯಾಸಿಗಳೂ ನನ್ನನ್ನು ನಂಬಿ ನಾನು ಹೇಳಿದ್ದನ್ನು ಕೇಳಿ ಸನ್ಮಾರ್ಗದಲ್ಲಿ ನಡೆಯಿರಿ ಎಂದರೆ ಈ ಮಹಾನುಬಾವ ಉಲ್ಟಾ ಹೇಳಿದ್ದ. "ನಾನು ಹೇಳುತ್ತೇನೆಂದು ನಂಬಬೇಡಿ, ಅದು ನಿಮ್ಮ ಅನುಭವಕ್ಕೆ ಬಂದಾಗ ನಂಬಿ. ನಿಮಗೆ ನೀವೆ ಗುರು ಅಪ್ಪಿತಪ್ಪಿಯೂ ನನ್ನನ್ನು ಗುರು ಎಂದು ನಂಬಬೇಡಿ,ಯಾರು ದೇವರನ್ನು ತೋರಿಸುತ್ತೇನೆ ಎಂದು ಹೇಳುತ್ತಾರೋ ಅವರು ಸುಳ್ಳು ಹೇಳುತ್ತಿದ್ದಾರೆಂದು ಅರ್ಥ, ದೇವರನ್ನು ಅವರವರೇ ಕಾಣಬೇಕು, ಬೇರೆಯವರು ತೋರಿಸಲು ಸಾಧ್ಯವಿಲ್ಲ. ಮಾರ್ಗ ಸಾವಿರಾರುಇದೆ ಆಯ್ಕೆ ಅವರವರದ್ದು. ಸೆಕ್ಸ್ ಎಂಬುದು ಪ್ರಕೃತಿ ಸಹಜ ಅದನ್ನು ತಲೆಯೊಳಗೆ ಇಟ್ಟುಕೊಂಡು ರುಗ್ಣರಾಗಬೇಡಿ ತಲೆಯೊಳಗೆ ಇದ್ದಷ್ಟು ಅದು ವಿಕಾರರೂಪ ತಾಳುತ್ತದೆ," ಎಂಬಂತಹ ವಾಕ್ಯಗಳನ್ನು ಹೇಳಿದ ಗುರುವಲ್ಲದ ಗುರು ಸಂತನಲ್ಲದ ಸಂತ ಒಶೋ ರಜನೀಶ್ ಎಂದು ನಿಮಗೆ ಗೊತ್ತು. ಆತ ಸಾವಿರಾರು ಪುಸ್ತಕಗಳನ್ನು ಓದಿದ ಹಾಗೂ ಬರೆದ ಮತ್ತು ವಿಧವಿಧವಾದ ಜೀವನಾನುಭವವನ್ನು ಪಡೆದ ಮಹಾನುಭಾವಿ. ಹಾಗೆಹೇಳುತ್ತಾ ಹೇಳುತ್ತಾ ಕಾಲವಾದ ಅವರ ತತ್ವ ಸ್ವಲ್ಪ ಅರ್ಥವಾದರೆ ಸುಂದರ ಸುಮಧುರ ಪ್ರಪಂಚದ ಅರಿವಾಗುತ್ತದೆ.

ಎಲ್ಲರಂತೆ ನಾವು ಅಲ್ಲ ಎಂಬ ಭಾವನೆ ಎಲ್ಲರಲ್ಲಿಯೂ ಇರುತ್ತದೆ. ನಾವು ಕೆಲಸ ಮಾಡುತ್ತೇವೆ ಮಾತನಾಡುತ್ತೇವೆ ಬರೆಯುತ್ತೇವೆ, ಓದುತ್ತೇವೆ, ಊಟ ಆಟ ಹೀಗೆ ಪಟ್ಟಿ ಬೆಳೆಯುತ್ತಲೇ ಸಾಗುತ್ತದೆ ಅವೆಲ್ಲಾ ಒಂದೆಡೆ ಇರಲಿ. ಇವುಗಳನ್ನೆಲ್ಲಾ ಮಾಡುವುದಕ್ಕೆ ಕೆಲವರು ಮೆದುಳನ್ನು ಬಳಸುತ್ತಾರೆ ಇನ್ನು ಕೆಲವರು ಹೃದಯವನ್ನು ಬಳಸುತ್ತಾರೆ ಎಂದು ಓಶೋ ಹೇಳುತ್ತಾರೆ . ಇದೇನು ತರ್ಲೆ ಅಂದಿರಾ , ಇರಲಿ ಸ್ವಲ್ಪ ಸಹಿಸಿಕೊಳ್ಳಿ ಮುಂದೆ ನೋಡೋಣ

ಒಂದಾನೊಂದು ಊರಲ್ಲಿ ಒಬ್ಬ ಗ್ರಹಸ್ಥನಿದ್ದ, ಬೆಳ್ಳನೆಯ ಹೆಂಡತಿ ಆರತಿಗೊಬ್ಬಳು ಮಗಳು ಕೀರ್ತಿಗೊಬ್ಬ ಮಗ ಕೈತುಂಬಾ ಕಾಸು ಸ್ವರ್ಗಕ್ಕೆ ಕಿಚ್ಚು ಹಚ್ಚುವಂತಹ ಸುಖೀ ಸಂಸಾರ ಆತನದು. ಆತ ತನ್ನನ್ನು ತನ್ನ ಸಂಸಾರವನ್ನು ಹೊರತುಪಡಿಸಿ ಮಿಕ್ಕ ಯಾರಿಗೂ ಕವಡೆಕಾಸಿನ ಉಪಕಾರವನ್ನು ಮಾಡುತ್ತಿರಲಿಲ್ಲ ಹಾಗಾಗಿ ಆತನನ್ನು ಕೃಪಣ ಜಿಪುಣ ಮುಂತಾಗಿ ಊರವರು ಕರೆಯುತ್ತಿದ್ದರು. ಇದ್ದಕ್ಕಿಂದಂತೆ ಆತನಿಗೆ ಹೃದಯಾಘಾತವಾಯಿತು . ಹಣಕಾಸಿನ ತೊಂದರೆ ಇಲ್ಲದ್ದರಿಂದ ಆತ ವೈದ್ಯರುಗಳ ಶ್ರಮದಿಂದ ಬದುಕುಳಿದ. ಹೃದಯಾಘಾತದ ಆಘಾತ ಮಾಯವಾಗುವ ಮೊದಲೆ ಅದ್ಯಾರೋ ಕೋರ್ಟಿನಲ್ಲಿ ಅವನ ವಿರುದ್ಧ ಕೇಸು ಹಾಕಿದರು. ಹೀಗೆ ಸುಖವಾಗಿದ್ದ ಸಂಸಾರದಲ್ಲಿ ಒಂದರ ಹಿಂದೆ ಒಂದಂತೆ ಆಘಾತಗಳು ಎರಗತೊಡಗಿದವು. ಆವಾಗ ಸಲಹೆಕಾರರು ಆಕಳೊಂದನ್ನು ಸಾಕು ಗೋಪೂಜೆಯಿಂದ ಎಲ್ಲಪರಿಹಾರವಾಗುತ್ತದೆ ಎಂದರು. ಸಂಕಟ ಬಂದಾಗ ವೆಂಕಟರಮಣ ಎಂಬಂತೆ ಆತನಿಗೆ ಅದು ಸತ್ಯ ಅಂತ ಅನ್ನಿಸತೊಡಗಿತು. ಕಾರಣ ಪಕ್ಕದ ಮನೆಯಲ್ಲಿ ಉತ್ತಮ ಆಕಳು ಕರುಗಳೊಡನೆ ಕೊಟ್ಟಿಗೆ ತುಂಬಿ ತುಳುಕಾಡುತ್ತಿತ್ತು. ಅವರ ಮನೆಯಲ್ಲಿ ಹೃದಯಾಘಾತವೂ ಇರಲಿಲ್ಲ, ಕೋರ್ಟು ಕಛೇರಿಯ ತರ್ಲೆ ತಾಪತ್ರಯವೂ ಇರಲಿಲ್ಲ. ಆದಾಯದ ಐವತ್ತು ಭಾಗವನ್ನು ಅವರು ಗೋಸೇವೆಗೆ ಖರ್ಚು ಮಾಡುತ್ತಿದ್ದರು. ಸರಿ ಮಾರನೇ ದಿನ ಈತನೂ ಒಂದು ಆಕಳನ್ನು ಖರೀದಿಸಿದ. ನಿತ್ಯ ಮೈ ತೊಳೆಯುವುದು, ದಾಣಿ ಇಡುವುದು ಮುಂತಾದ ಸೇವೆಯಲ್ಲಿ ತನ್ನನ್ನು ತಾನು ತೊಡಗಿಸಿಕೊಂಡ. ಅದೇನು ಕಾಕತಾಳೀಯವೋ ಸತ್ಯವೋ ಹೃದಯ ಸರಿಯಾಯಿತು. ಕೋರ್ಟು ಕೇಸು ದಿಡೀರನೆ ಖುಲಾಸ್. ಆಕಳು ತಂದ ಎರಡು ತಿಂಗಳೊಳಗೆ ಎಲ್ಲಾ ಮಾಮೂಲಿಯಂತೆ ನಡೆಯತೊಡಗಿತು( ಇದು ಕತೆ . ಕೋರ್ಟು ಹೃದಯದ ತೊಂದರೆಯಿದ್ದವರೆಲ್ಲಾ ಆಕಳು ಸಾಕಲು ಶುರುಮಾಡಿ ಪರಿಹಾರ ಕಾಣದಿದ್ದರೆ ನಾನು ಜವಾಬ್ದಾರನಲ್ಲ..........!) ಈಗ ಆತನಿಗೆ ಮಿದುಳು ಕೆಲಸಮಾಡಲು ಶುರುಮಾಡಿತು. ಈ ಆಕಳಿಗೆ ಇಷ್ಟೆಲ್ಲಾ ಖರ್ಚು ಮಾಡಿ ಸುಮ್ಮನೆ ಹಣವನ್ನು ವ್ಯರ್ಥ ಮಾಡುತ್ತಿದ್ದೇನಲ್ಲ ಅಂತ ಅನ್ನಿಸತೊಡಗಿತು. ಸರಿ ಆತ ಮಾರನೇದಿನ ಆಕಳುಹಾಗೂ ಕರುವನ್ನು ಮಾರಲು ತೀರ್ಮಾನಿಸಿದ. ಆದರೆ ಕೊಳ್ಳಲು ಸುಲಭವಾಗಿ ಯಾರೂ ಮುಂದೆಬರಲಿಲ್ಲ. ಆವಾಗ ಆತ ತಾನು ಸಮಸ್ಯೆಯಲ್ಲಿ ಸಿಕ್ಕಿದ್ದು ಹಾಗೂ ಆಕಳು ಮನೆಗೆ ಬಂದನಂತರ ಸಮಸ್ಯೆಗಳು ಬಾಳೆಹಣ್ಣು ಸುಲಿದಂತೆ ಮಾಯವಾದದ್ದು ಮುಂತಾದವುಗಳನ್ನು ಎಳೆ ಎಳೆಯಾಗಿ ಜನರ ಬಳಿ ಹೇಳತೊಡಗಿದ. ಕೆಲದಿನದಲ್ಲಿ ಊರಿನ ಮತ್ತೊಬ್ಬರಿಗೆ ಹೃದಯಾಘಾತವಾಯಿತು . ಮಾರನೆ ದಿವಸ ಈತನ ಆಕಳು ದುಪ್ಪಟ್ಟು ದರಕ್ಕೆ ಅವರಿಗೆ ಮಾರಾಟವಾಯಿತು.

ಈಗ ನಿಮಗೆ ಅರ್ಥವಾಗಿರಬೇಕು ಮಿದುಳಿನ ಕೆಲಸವೆಂದರೆ ಯಾವುದು ಅಂತ. ಇದೇ ಕತೆಯಲ್ಲಿ ಹೃದಯ ಕೆಲಸದ ಉದಾಹರಣೆ ಇದೆ, ಆದಾಯದ ಐವತ್ತು ಭಾಗ ಆಕಳು ಕೊಟ್ಟಿಗೆಗೆ ವ್ಯಯಿಸುತ್ತಿದ್ದಾನಲ್ಲ ಆತನದು. ಅವನಿಗೆ ಆಯ ವ್ಯಯ ದ ಬಗ್ಗೆ ಗಮನವಿರುವುದಿಲ್ಲ , ಹೃದಯಪೂರ್ವಕವಾಗಿ ಆಕಳನ್ನು ಸಾಕುತ್ತಿರುತ್ತಾನೆ

ಇಂತಹ ಸಣ್ಣ ಸಣ್ಣ ಕತೆಗಳ ಮೂಲಕ ಓಶೋ ಇಷ್ಟವಾಗುತ್ತಾರೆ .

ಯಾರಾದರೂ ನಿಮ್ಮ ಬಳಿ ನಿಮ್ಮ ಕೆಲಸಕ್ಕೆ "ನಾನು ನಿಮ್ಮನ್ನು ಹೃದಯಪೂರ್ವಕವಾಗಿ ಅಭಿನಂದಿಸುತ್ತೇನೆ " ಎಂದು ಹೇಳಿದ ನಂತರ ಒಂದು ಕ್ಷಣ ಯೋಚಿಸಿ ಅದು ಖಂಡಿತ ಅವರ ಮಿದುಳಿನ ಕೆಲಸ. ನಿಮ್ಮನ್ನು ಹೀಗೆ ಅಭಿನಂದಿಸುವುದರಿಂದ ತನಗೆ ಲಾಭವಿದೆ ಎಂದು ಅವರ ಮಿದುಳು ಲೆಕ್ಕಾಚಾರ ಹಾಕಿ ಈ ಮಾತನ್ನು ಹೇಳಿಸುತ್ತದೆ. ನಿಜವಾಗಿಯೂ ಅವರ ಹೃದಯ ನಿಮ್ಮ ಕೆಲಸಕ್ಕೆ ತುಂಬಿಬಂದಿದ್ದರೆ ಅವರು ನಿಮ್ಮ ನ್ನು ಭೇಟಿ ಮಾಡಿದ ತಕ್ಷಣ ಅವರ ಮುಖ ಅವರ ಕಣ್ಣುಗಳು ಅಭಿನಂದನೆಗಳನ್ನು ಸಲ್ಲಿಸಿಬಿಟ್ಟಿರುತ್ತದೆ. ಹೃದಯಪೂರ್ವಕ ಅಭಿನಂದನೆಗಳನ್ನು ಬರೆದು ಸಲ್ಲಿಸಬಹುದು , ಭೇಟಿಯಾದಾಗ ಹೇಳುವ ಅವಶ್ಯಕತೆ ಇರುವುದಿಲ್ಲ. ಇದೆ ಅಂತಾದರೆ ಅದು ಪಕ್ಕಾ ಮೆದುಳಿನ ಕೆಲಸ. ಇಂತಹ ನೂರಾರು ಹೊಸ ಹೊಸ ಯೋಚನೆಗಳು ವಿಷಯಗಳು ಒಶೋವಿನ ಬುಟ್ಟಿಯಲ್ಲಿವೆ. ಸ್ವಲ್ಪ ಬಸಿದುಕೊಂಡರೆ ಏಕಾಂಗಿಯಾದಾಗ ಆಸ್ವಾದಿಸಬಹುದು.

ಪ್ರೀತಿ ಪ್ರೇಮ ದೇವರು ಧರ್ಮ ಮುಂತಾದ ಶಭ್ದಗಳು ಹೃದಯಕ್ಕೆ ಸಂಬಂಧಪಟ್ಟಿದ್ದು. ಹಣ, ಲೋಭ ಲಾಭ,ಮೋಹ ಮದ ಮತ್ಸರ ಮುಂತಾದವುಗಳೆಲ್ಲಾ ಮಿದುಳಿಗೆ ಸಂಬಂಧಪಟ್ಟಿದ್ದು. ಹೃದ್ಯಯಕ್ಕೆ ಸಂಬಂಧಪಟ್ಟ ವಿಷಯದಲ್ಲಿ ಸುಖ ಸ್ವಲ್ಪ ಹೆಚ್ಚು ಮೆದುಳಿಗೆ ಸಂಬಂಧಪಟ್ಟ ವಿಷಯಗಳಲ್ಲಿ ಸುಖ ಸ್ವಲ್ಪ ಕಷ್ಟ.

ಓಶೋ ಹೇಳಿದ್ದು ಅದನ್ನೆ ಅನುಭವಕ್ಕೆ ಬಂದರೆ ನಂಬು ಇಲ್ಲದಿದ್ದರೆ ಬಿಟ್ಟಾಕು.... ...... ಬಿಟ್ಟಾಕು ....ಬಿಟ್ಟಾಕು

ಡಾ ದೀಪಕ್ ಮತ್ತು ಸ್ವಾಮಿ ವಿವೇಕಾನಂದ ಮತ್ತು ಕೆಲಸವೆಂಬ ಪೂಜೆ

ಚಿಕಾಗೋ ವಿಶ್ವಧರ್ಮ ಸಮ್ಮೇಳನದಲ್ಲಿ ಸೇರಿದ್ದ ಪ್ರಪಂಚದ ಪ್ರೇಕ್ಷಕರೆದುರು ಹಿಂದೂ ಧರ್ಮವನ್ನು ಎತ್ತರಕ್ಕೆ ಏರಿಸಿದವರು ಸ್ವಾಮಿ ವಿವೇಕಾನಂದ ಎಂದು ನಿಮಗೆ ಗೊತ್ತು. ಅಂದು ವಿವೇಕಾನಂದರು "ಅಕ್ಕತಂಗಿಯರೆ ಅಣ್ಣ ತಮ್ಮಂದಿರೆ" ಎಂದು ಭಾಷಣ ಪ್ರಾರಂಬಿಸುತ್ತಿದ್ದಂತೆ ಇಡೀ ಸಭೆಯೇ ಬೆಕ್ಕಸಬೆರಗಯಿತು ಆ ಕಾರಣಕ್ಕಾಗಿ ಅವರು ಪ್ರಖ್ಯಾತಿಯಾದರು ಎಂದು ನಾನೂ ನಾಲ್ಕನೇ ಕ್ಲಾಸಿನ ಪುಸ್ತಕದಲ್ಲಿ ಓದಿದ್ದೆ. ನೀವೂ ಓದಿರುತ್ತೀರಿ. ಪರೀಕ್ಷೆಯಲ್ಲಿ ಪ್ರಶ್ನೆಗೆ ಉತ್ತರ ಬರೆದಾದಮೇಲೆ ನಾನಂತೂ ಮರೆತಿದ್ದೆ. ನೀವು ಮರೆತಿರೋ ಬಿಟ್ಟಿರೋ ಗೊತ್ತಿಲ್ಲ. ಒಮ್ಮೆ ಬೆಂಗಳೂರಿನಲ್ಲಿ ಹೀಗೆ ಮಾತನಾಡುತ್ತಿದ್ದಾಗ ನರಹರಿ(ನನಗೆ ವರಸೆಯಲ್ಲಿ ಅವರು ಬಾವನಾಗಬೇಕು , ಹಾಗಂತಲೇ ಇಲ್ಲಿ ಬಾವ ಬಾವ ಎಂದು ಬರೆಯುತ್ತ ಹೋದರೆ ಭಾವದ ಅಭಾವವಾಗುತ್ತದೆ ಎನ್ನುವ ಕಾರಣಕ್ಕೆ ಹೆಸರಿಂದಲೇ ಬರೆಯುತ್ತಿದ್ದೇನೆ) ಹೇಳಿದರು. ಅಕ್ಕತಂಗಿಯರೇ ಅಣ್ಣತಮ್ಮಂದಿರೇ ಎಂದು ಭಾಷಣ ಪ್ರಾರಂಭ ಮಾಡಿದ ಮಾತ್ರಕ್ಕೆ ಇಡೀ ಸಭೆ ಮರುಳಾಗಲಿಲ್ಲ. ವಿವೇಕಾನಂದರ ಬಳಿ ಅಷ್ಟೊಂದು ತಾಕತ್ತು ಇತ್ತು. ಅವರು ಧ್ಯಾನದ ಆಳವನ್ನು ಹಿಂದೂಧರ್ಮದ ಅಗಲವನ್ನೂ ಆಳವಾಗಿ ತಿಳಿದಿದ್ದರು. ಅದರ ಹಿನ್ನೆಲೆ ಹೀಗಿದೆ. ವಿವೇಕಾನಂದರು ವಿಶ್ವಧರ್ಮ ಸಮ್ಮೇಳನಕ್ಕೆ ಅಲ್ಲಿಗೆ ಹೋದಾಗ ಅವರಿಗೆ ಭವ್ಯವಾದ ಸ್ವಾಗತವೇನೂ ಸಿಕ್ಕಿರಲಿಲ್ಲ. ವೇದಿಕೆಯಲ್ಲಿ ಭಾಷನ ಮಾಡುವ ಪ್ರತಿಯೊಬ್ಬರೂ ಅದಕ್ಕಾಗಿಯೇ ನಿಯೋಜಿಸಲ್ಪಟ್ಟಿದ್ದ ಪಾಶ್ಚಾತ್ಯ ಮಹಿಳೆಯೊಬ್ಬರ ಬಳಿ ತಮ್ಮ ಹೆಸರನ್ನು ನೋಂದಾಯಿಸಬೇಕಾಗಿತ್ತು. ಆಕೆ ಅವರಿಗೆ ಸಮಯವನ್ನು ನಿಗದಿಪಡಿಸುತ್ತಿದ್ದರು ವಿವೇಕಾನಂದರು ಆ ಮಹಿಳೆಯ ಮನೆಗೆ ಬೆಳಿಗ್ಗೆ ಹೋದರು. ಆಕೆ ಈ ಕಾವಿ ವೇಷಧಾರಿ ಈ ಸಂತನನ್ನು ಅಷ್ಟಾಗಿ ಗಣನೆಗೆ ತೆಗೆದುಕೊಳ್ಳಲಿಲ್ಲ. ಅರ್ದ ಗಂಟೆ ಕುಳಿತಿರಿ ಎಂದು ಹಜಾರದಲ್ಲಿ ವಿವೇಕಾನಂದರನ್ನು ಕೂರಿಸಿ ಒಳನಡೆದಳು. ಅರ್ದ ಗಂಟೆಗಳ ಕಾಲ ಅಲ್ಲಿ ಕುಳೀತಿದ್ದ ವಿವೇಕಾನಂದರು ಮೇಜಿನ ಮೇಲಿದ್ದ ಇಂಜನಿಯರಿಂಗ್ ವಿಷಯಕ್ಕೆ ಸಂಬಂಧಪಟ್ಟ ಪುಸ್ತಕವನ್ನು ತಿರುವಿ ಹಾಕುತ್ತಾ ಕುಳಿತಿದ್ದರು. ಅರ್ದಗಂಟೆಯ ನಂತರ ಅಚೆ ಬಂದ ಮಹಿಳೆ ಭಾರತದ ಸಂತನ ಕೈಯಲ್ಲಿದ್ದ ಪುಸ್ತಕವನ್ನು ನೋಡಿ " ಓಹೋ ಈತ ನಾಳೆಯ ಭಾಷಣಕ್ಕೆ ಸಮಯ ನಿಗದಿಪಡಿಸಿಕೊಳ್ಳಲು ಬಂದಿರುವ ಸನ್ಯಾಸಿ , ತನ್ನನ್ನು ಇಂಪ್ರೆಸ್ ಮಾಡಲು ಇಂಜನಿಯರಿಂಗ್ ಪುಸ್ತಕ ಓದುತ್ತಿದ್ದಾನೆ, ಈತನಿಗೇನು ಗೊತ್ತು ಇಂಜನಿಯರ್ ಬಗ್ಗೆ ಎಂದು ಆಲೋಚಿಸುತ್ತಾ. "ಸರ್ ಆ ಪುಸ್ತಕದ ವಿಷಯ ನಿಮಗೆ ಅರ್ಥವಾಯಿತಾ..? ಅದೂ ನೀವು ಅರ್ದ ಗಂಟೆಯೊಳಗೆ ಮುನ್ನೂರು ಪುಟ ಮುಗಿಸಿದಂತಿದೆ" ಎಂದು ವ್ಯಂಗ್ಯವಾಡಿದಳು.ಆಗ ವಿವೇಕಾನಂದರು "ಇಲ್ಲಿಯವರೆಗೆ ಓದಿದಷ್ಟು ಅರ್ಥವಾಗಿದೆ" ಎಂದು ಆಕೆಗೆ ಸರಿ ಸುಮಾರು ಎರಡು ಗಂಟೆಗಳ ಕಾಲ ತಾವು ಓದಿದ್ದ ವಿಷಯದ ಬಗ್ಗೆ ವಿವರಿಸಿದರಂತೆ. ಆಗ ಆ ಮಹೀಳೆ ವಿವೇಕಾನಂದರ ಮನೋಶಕ್ತಿಗೆ ತಲೆ ಬಾಗಿ ತನ್ನ ತಪ್ಪನ್ನು ಮನ್ನಿಸುವಂತೆ ಕೇಳಿಕೊಂಡು ಭಾಷಣಕ್ಕೆ ಅನುವು ಮಾಡಿಕೊಟ್ಟಳಂತೆ.


ಈ ಮೇಲಿನ ಘಟನೆ ವಿವೇಕಾನಂದರ ಗ್ರಾಹ್ಯಶಕ್ತಿಯನ್ನು ಉದಾಹರಿಸುತ್ತದೆ. ಮತ್ತು ಇಷ್ಟು ಗ್ರಾಹ್ಯ ಶಕ್ತಿ ಧ್ಯಾನದ ಮೊದಲನೆ ಹಂತದಲ್ಲಿಯೇ ಮನುಷ್ಯನಿಗೆ ಒಲಿಯುತ್ತದೆಯಂತೆ. ನಮಗೆ ಇಂಗ್ಲೀಷ್ ಅಥವಾ ಕನ್ನಡದ ವಾಕ್ಯದಲ್ಲಿನ ಒಂದೊಂದೇ ಶಬ್ಧಗಳು ಪಟಕ್ಕನೆ ತಲೆಯೊಳಗೆ ಹೋದಂತೆ ವಿವೇಕಾನಂದರಿಗೆ ಪುಟಗಳು ನೋಡಿದಾಕ್ಷಣ ತಲೆಯೊಳಗೆ ಹೋಗುತ್ತಿದ್ದವಂತೆ, ಇರಲಿ ಅವೆಲ್ಲಾ ಅಂತೆಕಂತೆಗಳಾಯಿತು, ಏಕೆಂದಂರೆ ನಾನು ವಿವೇಕಾನಂದರನ್ನು ನೋಡಿಲ್ಲ ಅವರ ಬಗ್ಗೆ ಓದಿಲ್ಲ ಸಂಪೂರ್ಣ ಹೇಗೂ ತಿಳಿದಿಲ್ಲ. ಆದರೆ ಮೊನ್ನೆ ಅವರ ತತ್ವಗಳನ್ನು ಅರೆದುಕುಡಿದ ವ್ಯಕ್ತಿಯೊಬ್ಬರನ್ನು ಭೇಟಿ ಮಾಡಿದೆ. ಅವರೇ ಡಾ.ದೀಪಕ್.

ಡಾ ದೀಪಕ್ ಸಾಗರದಲ್ಲಿ ಯಶಸ್ವಿ ಎಂಬಿಬಿಎಸ್ ಯುವ ಡಾಕ್ಟರ್. ಒಂದಿಷ್ಟು ಆಧ್ಯಾತ್ಮವನ್ನು ವಿವೇಕಾನಂದರ, ರಾಮಕೃಷ್ಣಪರಮಹಂಸರ ತತ್ವವನ್ನು ತಿಳಿದುಕೊಂಡವರು. ಹಾಗಂತ ವಿಜ್ಞಾನವನ್ನು ಅಲ್ಲಗಳೆದು ದೇವರಮೇಲೆ ಭಾರ ಹೊರಿಸುವ ಗಿರಾಕಿಯಲ್ಲ. ವಿಜ್ಞಾನದಿಂದ ಉತ್ತರ ಸಿಗದು ಎಂದಾದಮೇಲೆ ದೇವರ ಮೊರೆಹೋಗುವ ಜನ. ಬಹಳಷ್ಟು ಆಲೋಪತಿ ಡಾಕ್ಟರ್ ತರಹ ಹಣದ ಹಿಂದೆ ಹೋದವರಲ್ಲ. ಈ ಕಾಲದಲ್ಲಿಯೂ ಅವರ ಭೇಟಿ ಫೀ ೧೫-೨೦ ರ ಆಸುಪಾಸಿನಲ್ಲಿಯೇ ಇದೆ. ಅವರು ಹಾಸ್ಟೆಲ್ಲಿನಲ್ಲಿದ್ದಾಗ ಒಮ್ಮೆ ಖಾಯಿಲೆ ಬಿದ್ದಿದ್ದರಂತೆ. ಹಾಸ್ಟೆಲ್ಲಿನ ವಾರ್ಡನ್ ಒಬ್ಬ ರಾಮಕೃಷ್ಣಾಶ್ರಮದ ಸನ್ಯಾಸಿ. ಖಾಯಿಲೆಬಿದ್ದಿರುವ ದೀಪಕರನ್ನು ಅವರು ಸ್ನಾನಮಾಡಿಸಿದರಂತೆ. ಸ್ನಾನ ಮಾಡಿಸುವಾಗ ಆ ಸನ್ಯಾಸಿ ಪುರುಷಸೂಕ್ತ ವನ್ನು ಪಠಿಸುತ್ತಿದ್ದರಂತೆ. ಇವರಿಗೆ ಆಶ್ಚರ್ಯವಾಯಿತು. ದೀಪಕ್ ಸ್ವಾಮೀಜಿಯಬಳಿ ತನ್ನನ್ನು ಸ್ನಾನ ಮಾಡಿಸುವಾಗ ಪುರುಷಸೂಕ್ತ ಪಠಿಸುವ ಕಾರಣ ಕೇಳಿದರಂತೆ. ಆವಾಗ ಅವರು" ಇದು ಭಗವಂತನ ಅಭಿಷೇಕ ಹಾಗಾಗಿ ಅದೇ ಸೂಕ್ತ." ಎಂದರಂತೆ. ದೀಪಕ್ ಗೆ ಅವರು ತನ್ನಲ್ಲಿಯೂ ದೇವರನ್ನು ಕಂಡಿದ್ದು ಆಶ್ಚ್ರಯ ಮೂಡಿಸಿತಂತೆ.

ನಂತರದ ದಿನಗಳಲ್ಲಿ ಒಮ್ಮೆ ವಿವೇಕಾನಂದರ ಕುರಿತು ಭಾಷಣ ಮಾಡುತ್ತಿದ್ದ್ರರಂತೆ. ಭಾಷಣ ಮುಗಿದ ಮೇಲೆ ವ್ಯಕ್ತಿಯೊಬ್ಬರು "ನೀವು ವಿವೇಕಾನಂದರ ಪ್ರತಿ ರೂಪ, ನಾನು ನಿಮ್ಮಲ್ಲಿ ವಿವೇಕಾನಂದರನ್ನು ಕಂಡೆ ಎಂದು ದಡಾಲನೆ ಕಾಲುಮುಟ್ಟಿ ನಮಸ್ಕರಿಸಿದರಂತೆ." ದೀಪಕ್ ಗೆ ಆ ಅನುಭವ ಅನಿರೀಕ್ಷಿತ.
ನಾವು ಮಾಡುವ ಕೆಲಸದಲ್ಲಿ ಭಗವಂತನನ್ನು ನಾವು ಕಾಣಲು ಸಾದ್ಯವೇ ಎಂಬಂತಹ ಲವಲೇಶದ ಅನುಮಾನವೂ ಇಲ್ಲದೆ ಮಗ್ನನಾದರೆ ಭಗವಂತನನ್ನು ಕಾಣಬಹುದು. ಅಥವಾ ಕಂಡಿದ್ದನ್ನು ಭಗವಂತ ಅಂದುಕೊಳ್ಳಬಹುದೆಂಬ ತರ್ಲೆ ಉತ್ತರವನ್ನೂ ಕಂಡುಕೊಳ್ಳಬಹುದು ಬಿಡಿ ಆ ವಿಚಾರವನ್ನು ಈಗ ವಿಷಯಕ್ಕೆ ಬರೋಣ

ಇದೂ ಅಂತೆ ಕಂತೆಗಳು , ಡಾ ದೀಪಕ್ ಹೇಳಿದ್ದು ಮತ್ತು ನಾನು ಕೇಳಿದ್ದು. ಡಾ ದೀಪಕ್ ಮನೆಗೆ ಕರೆದು ತಂಪಾಗಿ ಊಟ ಹಾಕಿ ಒಂದೂವರೆ ತಾಸು ಉಚಿತ ಪಾಠ ಮಾಡಿದ್ದು. ಮಾರನೇ ದಿನ ಡಾ.ದೀಪಕ್ ಹೇಳಿದ ಮಾತುಗಳು ತಲೆಯಲ್ಲಿ ಇನ್ನೂ ಗುಂಯ್ ಗುಟ್ಟುತ್ತಿತ್ತು. ಎಂಬತ್ತು ವರ್ಷದ ಅಪ್ಪಯ್ಯನಿಗೆ ದಿನವಿಡಿ ಮನೆಯಲ್ಲಿ ಕೂರಲು ಬೇಸರ. ದಿನಕ್ಕೊಮ್ಮೆ ತಾಳಗುಪ್ಪಕ್ಕೆ ಭೇಟಿಕೊಡಬೇಕು. ನನಗೆ ದಿನನಿತ್ಯ ಅವರನ್ನು ತಾಳಗುಪ್ಪಕ್ಕೆ ಹೋಗಲು ಬೈಕ್ ನಲ್ಲಿ ಬಸ್ಸಿಗೆ ಬಿಡಬೇಕು. ಏನೋ ಕೆಲಸವಿದ್ದಾಗ ಹೀಗೆ ಡ್ರಾಪ್ ಕೊಡುವುದು ಬೇಸರತರಿಸಿಬಿಡುತ್ತದೆ. ವಾಪಾಸು ಬರುವ ಬಸ್ಸನ್ನು ಕಾದು ಮನೆಗೆ ಕರೆದುಕೊಂಡು ಬರಬೇಕು. ಅಕಸ್ಮಾತ್ ಒಂದೈದು ನಿಮಿಷ ವ್ಯತ್ಯವಾದರೂ ಹತ್ತು ಬಾರಿ ಸರಿಯಾದ ಸಮಯಕ್ಕೆ ಕರೆದುಕೊಂಡುಹೋಗಿ ಬಿಟ್ಟ ವಿಷಯವನ್ನೂ ಮರೆತು ಬೈಸಿಕೊಳ್ಳಬೇಕು. ಅದು ಅವರ ಸ್ವಭಾವ ಬಿಡಿ. ಆದರೂ ಒಮ್ಮೊಮ್ಮೆ ತಾಳ್ಮೆಕೆಡುತ್ತದೆ. ಆವಾಗೆಲ್ಲ ಸಿಟ್ಟನ್ನು ಅದುಮುತ್ತೇನೆ. ಒಮ್ಮೊಮ್ಮೆ ಬಹಳ ಕಷ್ಟವಾಗುತ್ತದೆ. ಆದರೂ ಈ ಹತ್ತು ವರ್ಷದಲ್ಲಿ ಒಂದು ಬಾರಿಯೂ ಸಿಟ್ಟನ್ನು ವ್ಯಕ್ತಪಡಿಸಲಿಲ್ಲ. ವ್ಯಕ್ತಪಡಿಸದಿದ್ದರೂ ಮ ನಸ್ಸಿಗೆ ಕಷ್ಟವಾಗುತ್ತದೆ. ಮೊನ್ನೆ ಹಾಗೆಯೇ ಆ ಯಿತು, ಬಸ್ಸಿಗೆ ಕಾದೂ ಕಾದೂ ಅ ಸಹನೆ ಪ್ರಾರಂಭವಾಯಿತು. ಆ ವಾಗ ಡಾ ದೀಪಕ್ ರ ಸ್ನಾನದ ಕತೆ ನೆನಪಾಯಿತು. ಹೌದು ಬಸ್ಸಿಗೆ ಬರುವುದು ಭಗವಂತ, ಅವನ ದರ್ಶನಕ್ಕೆ ನಾನು ಕಾಯುತ್ತಿದ್ದೇನೆ ಅಂತ ಅಂದುಕೊಂಡೆ. ಅರೆ ಆಶ್ಚರ್ಯ ನನ್ನೊಳಗಿನ ಅಸಹನೆ ತಟ್ಟನೆ ಮಾಯವಾಯಿತು. ನನಗೆ ಆಶ್ಚ್ರಯ ಆಗಲು ಪ್ರಮುಖ ಕಾರಣ ನಾನು ಇತ್ತೀಚಿಗೆ ದೇವರು ಭಗವಂತ ಅಂತ ಹಿಂದೆ ಅಷ್ಟಾಗಿ ಹೋದವನಲ್ಲ. ಇದೇನೋ ಹೊಸ ಅನುಭವ. ಇರಲಿ ಇಂತಹ ನಂಬಿಕೆಗಳು ಖುಷಿಕೊಡುತ್ತವೆ ಅಂತಾದರೆ ಇರಲಿ.
ವಿವೇಕಾನಂದರ ಹೇಳಿದ ಬೇಸಿಕ್ ತತ್ವ ಕೆಲಸದಲ್ಲಿ ಭಗವಂತನನ್ನು ಕಾಣುವುದಂತೆ. ಎಲ್ಲವುದಕ್ಕೂ ಗೊತ್ತಿಲ್ಲ, ಸಣ್ಣ ಪುಟ್ಟ ಅಸಮಾಧಾನವನ್ನು ಹೀಗೆ ಹೋಗಲಾಡಿಸಿಕೊಳ್ಳಬಹುದು. ಅಷ್ಟೊಂದು ಆ ಳವಾದ ಅ ರ್ಥ ನಮ್ಮಂತಹ ಪಾಮರರಿಗೆ ಆಗದು. ಗಟ್ಟಿ ಕೇಳಿದರೆ ನಮಗೆಲ್ಲಾ ಆಳವಾದ ಅಧ್ಯಾತ್ಮ ಅ ಗತ್ಯವೂ ಇ ಲ್ಲ. ಮೇಲ್ಪದರಿನ ಟಚ್ ಅರ್ಥವಾದರೆ ಹ್ಯಾಪಿ ಲೈಫ್ ಚಾನ್ಸು ಅಷ್ಟೆ.

ಇಲ್ಲಿ ಭವಿಷ್ಯ ಹೇಳಲಾಗುತ್ತದೆ............!

ಇಲ್ಲಿ ಭವಿಷ್ಯ ಹೇಳಲಾಗುತ್ತದೆ............!. ಹೀಗೊಂದು ಬೋರ್ಡನ್ನು ನೀವು ಎಲ್ಲಿಯಾದರೂ ನೋಡಿಯೇ ನೋಡಿರುತ್ತೀರಿ. ಮತ್ತು ಆ ಕ್ಷಣದಲ್ಲಿ ಇದೊಂದು ಮೋಸದ ತಾಣ ಅಂತ ಅಂದುಕೊಂಡಿರಲೂ ಬಹುದು.ಅಲ್ಲಿ ಹಲವಾರು ಜನರ ಸಂತೆಯನ್ನು ನೋಡಿದ ನೀವು ಎಂತಹಾ ಮರುಳರಪ್ಪಾ ಇವರು, ನಮ್ಮ ಭವಿಷ್ಯ ನಿರ್ಮಾತೃಗಳು ನಾವೇ, ಇವನ್ಯಾರೋ ಭವಿಷ್ಯ ಹೇಳುತ್ತಾನೆ ಎಂದು ಜನ ಕ್ಯೂ ನಿಂತಿದ್ದಾರಲ್ಲ ಹುಚ್ಚರ ಸಂತೆ ಇದು. ನಮ್ಮ ದೇಶ ಉದ್ಧಾರವಾಗದು ಎಂದು ಗೊಣಗಿರುತ್ತೀರಿ. ಅನ್ ಎಜುಕೇಟೆಡ್ ಬ್ರೂಟ್ಸ್ ಎನ್ನುವ ತೀರ್ಮಾನಕ್ಕೆ ಬಂದಿರುತ್ತಿರಿ. ಸ್ವಲ್ಪ ಇರಿ ನೀವು ಇಂತಹ ಬೋರ್ಡ್ ಇರುವ ಹಾಗೂ ಬೋರ್ಡ್ ಇಲ್ಲದಿರುವ ಭವಿಷ್ಯಾಲಯಗಳು ಮೋಸದ ತಾಣ ಎಂದು ತೀರ್ಮಾನಕ್ಕೆ ಬರುವ ಸಮಯದಲ್ಲಿ ನಿಮ್ಮ ಉದ್ಯೋಗ,ಹಣಕಾಸಿನ ಪರಿಸ್ಥಿತಿ, ಹೆಂಡತಿ ಮಕ್ಕಳು ಸೇರಿದಂತೆ ಎಲ್ಲವೂ ಸೌಖ್ಯ. ಬಿ.ಪಿ, ಷುಗರ್ , ಅಸಿಡಿಟಿ, ಗೊರ ಗೊರ ಎನ್ನುವ ದಮ್ಮು ಮುಂತಾದ ಯಾವ ಖಾಯಿಲೆಯೂ ಇಲ್ಲ, ನೀವು ಹೇಳಿದಂತೆ ನಡೆಯುತ್ತಿದೆ ಪ್ರಪಂಚ. ಇದ್ದಕ್ಕಿದ್ದಂತೆ ಡ್ಯೂಟಿಗೆ ಹೋಗುತ್ತಿದ್ದ ಹೆಂಡತಿ ಸಿಡಿಮಿಡಿ ಪ್ರಾರಂಬಿಸುತ್ತಾಳೆ, ನಿನಗಿಂತ ನಾನೇನು ಕಮ್ಮಿ, ನನ್ನನ್ನು ಹರ್ಟ್ ಮಾಡಬೇಡ, ಮುಂತಾದ ರಗಳೆ ಶುರುವಾಗುತ್ತದೆ. ಚೂಟಿಯಾಗಿದ್ದ ಮಗಳಿಗೆ ಮಂಕು ಕವಿಯುತ್ತದೆ. ಆಫೀಸಿನ ಬಾಸ್ ಉಗಿಯುತ್ತಾನೆ. ನೀವೇ ಬಾಸ್ ಆಗಿದ್ದರೆ ಕಸ್ಟಮರ್ ಕೈ ಎತ್ತುತ್ತಾನೆ. ಶೇರು ಮಾರುಕಟ್ಟೆ ಕುಸಿದು ಒಂದೇ ವರ್ಷದಲ್ಲಿ ಡಬ್ಬಲ್ ಆಗಲೆಂದು ಹಾಕಿದ ಹಣ ಡಂ ಎನ್ನುತ್ತದೆ. ದುಡಿಯುತ್ತಿದ್ದ ಮನೆ ಮಗ ಬೈಕ್ ಅಪಘಾತ ಮಾಡಿಕೊಂಡು ಬೆನ್ನೆಲಬು ಮುರಕೊಂಡು ಶಾಶ್ವತ ಅಂಗವಿಕಲನಾಗುತ್ತಾನೆ. ಇಂತಹ ಪರಿಹಾರವಿಲ್ಲದ ಸಮಸ್ಯೆಗಳು ಎದ್ದು ಕುಣಿದಾಗ ತಾಳ್ಮೆ ಮಾಯವಾಗುತ್ತದೆ. ಆವಾಗ ಗರಿಬಿಚ್ಚಿಕೊಳ್ಳುವುದೇ ನನಗೇನೋ ಗ್ರಹಚಾರ ಹಿಡಿದಿದೆ, ಟೈಮ್ ಸರಿ ಇಲ್ಲ, ಎಂಬಂತಹ ವಾಕ್ಯಗಳು. ಇಂತಹ ವಾಕ್ಯಗಳು ಮನದಲ್ಲಿ ಸುಳಿದಾಗ ಆತ್ಮೀಯರ ಬಳಿಯೋ ಅಥವಾ ತೀರಾ ಆಳವಾದ ಸಮಸ್ಯೆಯಾದರೆ ಅಪರಿಚಿತರಾದರೂ ಸೈ, ಅವರ ಬಳಿಯೂ ಅಲವತ್ತು ಕೊಳ್ಳುತ್ತೀರಿ. ಆವಾಗ ಗಣಪತಿ ಹೋಮ ಮಾಡಿಸು, ಅಲ್ಲಾ ಎನ್ನು, ಅಮೆನ್ ಹೇಳು ಎನ್ನುವಂತಹ ಸಲಹೆ ಸಿಗುತ್ತದೆ. ಮತ್ತೂ ಮುಂದುವರೆದಾಗ ನನಗೊಬ್ಬ ಜ್ಯೋತಿಷಿ ಗೊತ್ತಿದ್ದಾರೆ, ಅವರು ಮಕ್ಕಾಕಮಕ್ಕಿ ಹೇಳುತ್ತಾರೆ. ಅಲ್ಲಿ ನಿನ್ನ ಸಮಸ್ಯೆಗೆ ಪರಿಹಾರ ಸಿಗುತ್ತದೆ ಹೋಗು ಅಥವಾ ಬಾ ಹೋಗೋಣ ಎನ್ನುವ ಸಲಹೆ ಕಾರ್ಯರೂಪಕ್ಕೆ ಇಳಿಯುತ್ತದೆ. ನೀವು ಆವಾಗ ಇಲ್ಲಿ ಭವಿಷ್ಯ ಹೇಳಲಾಗುತ್ತದೆ ಎನ್ನುವ ದ್ವಾರದ ಕೆಳಗೆ ಕ್ಯೂ ನಿಂತಿರುತ್ತೀರಿ, ಮತ್ತು ಹಾದಿಯಲ್ಲಿ ಹೋಗುವವರು "ಎಂತಹಾ ಮರುಳರಪ್ಪಾ ಇವರು, ನಮ್ಮ ಭವಿಷ್ಯ ನಿರ್ಮಾತೃಗಳು ನಾವೇ, ಇವನ್ಯಾರೋ ಭವಿಷ್ಯ ಹೇಳುತ್ತಾನೆ ........."ಮನಸ್ಸಿನಲ್ಲಿ ಹೇಳುತ್ತಾ ಹೋಗುತ್ತಿರುತ್ತಾರೆ.

ಕೊನೆಯದಾಗಿ: "ಇಲ್ಲ ಎಂತಹ ಸಮಸ್ಯೆ ಬಂದರೂ ನಾನು ಏಕಾಂಗಿಯಾಗಿ ಎದುರಿಸುತ್ತೇನೆ. ಎಲ್ಲಿಯೂ ಅಲವತ್ತುಕೊಳ್ಳುವುದಿಲ್ಲಾ"...... ಎನ್ನುವ ಜಾಯಮಾನದವರು ನೀವಾ. ಗೆದ್ದಿರಿ ನೀವು. ನಿಮಗಿಂತ ಹಿರಿಯರಿಲ್ಲ, ಕಂಗ್ರಾಟ್ಸ್ ....ಹ್ಯಾಪಿ ಲೈಫ್ ನಿಮ್ಮದು.

ಟಿ.ವಿ ೯ ಎಂಬ ಕಡ್ಡಿ ಚಾನಲ್ ಮತ್ತು ವರದಹಳ್ಳಿ ಶ್ರೀಧರರು

ಸಜ್ಜನಗಡದಿಂದ ಬಂದ ಸಜ್ಜನ ಶ್ರೀಧರ ಸ್ವಾಮಿಗಳ ತಪೋಭೂಮಿ ಸಾಗರದ ಸಮೀಪದ ವರದಹಳ್ಳಿ. ಅಲ್ಲಿ ಪ್ರಶಾಂತತೆ ನೆಲಸಿದೆ. ಗುಡ್ಡ ಬೆಟ್ಟಗಳ ನಡುವೆ ಶುದ್ಧವಾದ ಜುಳು ಜುಳು ಅಬ್ಬಿ ನೀರು ಹರಿಯುತ್ತದೆ. ಅದಕ್ಕೊಂದು ಮಾನವ ನಿರ್ಮಿತ ಗೋಮುಖ ಇದೆ. ಅದರ ಬಾಯಿಂದ ಬೀಳುವ ನೀರು ನೋಡಲು ಬೊಗಸೆಯಲ್ಲಿ ಹಿಡಿದು ಕುಡಿಯಲು ಆನಂದ. ಚಂದದ ಪುಷ್ಕರಣಿ ಇದೆ, ಅಲ್ಲಿ ತೀರ್ಥಸ್ನಾನ ಮಾಡಿದರೆ ಆನಂದ. ಗಿಡಮರಗಳಿವೆ ಹಾಗಾಗಿ ಶುದ್ಧಗಾಳಿ ಉಸಿರಾಡಲು ಪರಮಾನಂದ. ಪಾಠಶಾಲೆಯ ಮಕ್ಕಳ ವೇದಘೋಷ ಕೇಳಿಬರುತ್ತದೆ ಅದು ಕರ್ಣಾನಂದ. ಶ್ರೀಧರರು ಬದುಕಿದ ರೀತಿ ನಿಮಗೆ ಗೊತ್ತಿದ್ದರೆ ಅವರು ಓಡಾಡಿದ ಜಾಗಗಳಲ್ಲಿ ನೀವೂ ಓಡಾಡಿದರೆ ಮನಸ್ಸು ಪುಳಕಗೊಳ್ಳುತ್ತದೆ. ಇವೆಲ್ಲಾ ನೂರಕ್ಕೆ ನೂರು ಸತ್ಯ. ಆದರೆ ಮೊನ್ನೆ ಮೊನ್ನೆ ಟಿವಿ ನೈನ್ ಎಂಬ ಚಾನಲ್ಲಿನಲ್ಲಿ ಬಂತು ನೋಡಿ ಪವಾಡದ ಕತೆಗಳು ಅದು ಮಾತ್ರಾ... ಅಮ್ಮಾ. ಬೇಸರವಾಗುತ್ತದೆ.

ಕಳೆದ ಹದಿನೈದು ದಿವಸಗಳಿಂದ ವರದಳ್ಳಿ ಯಲ್ಲಿ ಜನಜಂಗುಳಿ. ಒಂದು ಗುರುವಾರ ಇಪ್ಪತ್ತು ಸಾವಿರ ಜನ ಸೇರಿದ್ದರಂತೆ. ಪ್ಲಾಸ್ಟಿಕ್ ಕ್ಯಾನ್ಗಳು ಸಾಗರದಲ್ಲಿ ಭರ್ಜರಿ ವ್ಯಾಪಾರವಂತೆ. ಗೋಮುಖದ ಅಬ್ಬಿ ನೀರನ್ನು ತುಂಬಿ ವ್ಯಾಪಾರ ಶುರುವಿಟ್ಟುಕೊಂಡಿದ್ದಾರಂತೆ. ಈ ನುಗ್ಗಾಟಕ್ಕೆ ಪ್ರಮುಖ ಕಾರಣ ಟಿವಿ ೯ ನಲ್ಲಿ ಬಂದ ವರದಿಗಳು. ತೀರ್ಥಸ್ನಾನ ಮಾಡಿದರೆ ಎಲ್ಲಾ ರೋಗಗಳು ಗುಣಮುಖವಾಗುತ್ತದೆಯಂತೆ. ಕೋಟಿಗಟ್ಟಲೆ ವ್ಯಾಪಾರದಲ್ಲಿ ಲಾಸ್ ಆದರೂ ಒಂದೇ ಒಂದು ಅವಾಜ್ ಪ್ರಾರ್ಥನೆ ಮಾಡಿದರೆ ಸಾಕು ವಾಪಾಸು ಮನೆಗೆ ಹೋಗುವುದರೊಳಗೆ ದಾರಿಯಲ್ಲಿಯೇ ನಿಮಗೆ ಯಾರಾದರೂ ಸಿಕ್ಕು ಸಮಸ್ಯೆ ಬಗೆ ಹರಿಯುತ್ತದೆಯಂತೆ. ರಾತ್ರಿ ಮೂರುಗಂಟೆಗೆ ಶ್ರೀಧರರು ಇಂದೂ ಪುಷ್ಕರಣೆಗೆ ಬಂದು ಸ್ನಾನ ಮಾಡಿಹೋಗುತ್ತಾರಂತೆ.(ಟಿ.ವಿ ಯಲ್ಲಿ ಈ ಹೇಳಿಕೆ ನೀಡಿದವರಿಗೆ ತಾನು ಎಂತಹ ಬಾಲಿಶ ಹೇಳಿಕೆ ನೀಡುತ್ತಿದ್ದೇನೆಂದು ಅರ್ಥವೇ ಆಗಿಲ್ಲ ವೆಂದು ಕಾಣಿಸುತ್ತದೆ ಕಾರಣ, ಶ್ರೀಧರರು ಇಂದೂ ಬೆಳಗಿನ ಜಾವ ಬಂದು ಹೋಗುತ್ತಾರೆ ಎಂದರೆ ಅವರಿಗೆ ಮುಕ್ತಿಯೇ ಸಿಕ್ಕಿಲ್ಲ ಎಂಬ ಅಪಾರ್ಥ ನೀಡುತ್ತದೆ) ಪಾದುಕೆಯ ಕಟ ಕಟ ಶಬ್ಧ ಆಲಿಸಿದರೆ ಕೇಳುತ್ತದೆಯಂತೆ. ಮಾತಿಲ್ಲದವರಿಗೆ ಮಾತು ಬರುತ್ತದೆ. ಸತ್ತವರು ಬದುಕಿ ಬರುತ್ತಾರೆ. ಮುಂತಾದ ಅಂತೆಕಂತೆಗಳನ್ನು ಸತ್ಯವೆಂಬಂತೆ ಬಿಂಬಿಸಿದ ವರದಿ. ಪಾಪ ಅಮಾಯಕ ಜನರು ಅಳಿದುಳಿದ ಹಣವನ್ನು ಬಾಚಿಬಳಿದುಕೊಂಡು ವಾಸಿಯಾಗದ ಖಾಯಿಲೆಗಳ ದೇಹವನ್ನು ಹೊತ್ತು, ದೂರದೂರದ ಊರಿನಿಂದ ವರದಹಳ್ಳಿಯತ್ತ ನುಗ್ಗತೊಡಗಿದ್ದಾರೆ. ನಂಬಿಕೆ ಕೆಲಸ ಮಾಡುತ್ತದೆ ನಿಜ ಆದರೆ ಕುರುಡು ನಂಬಿಕೆ ಹಣವನ್ನು ವ್ಯರ್ಥ ಹಾಗೂ ಸಮಸ್ಯೆಯನ್ನು ದ್ವಿಗುಣ ಮಾಡುತ್ತದೆ. ಟಿವಿ ನೈನ್ ವರದಿಗಾರ ವಿಚಿತ್ರ ಅಂಗಚೇಷ್ಟೆಯ ಮುಖೇನ ಹಾಗೂ ವಿಷಿಷ್ಠ ಧ್ವನಿಯ ಮುಖಾಂತರ ಬಿಂಬಿಸಿದ್ದು ಅದೆಷ್ಟು ಪ್ರಭಾವ ಬೀರಿದೆಯೆಂದರೆ ತಮ್ಮ ಎಲ್ಲಾ ಸಮಸ್ಯೆಯೂ ಬಗೆಹರಿಯಿತು ಎಂದು ಜನ ನಂಬಿದ್ದಾರೆ. ವರದಹಳ್ಳಿಗೆ ಬಂದು ಹೋದ ನಂತರ ಯಾವಬದಲಾವಣೆಯೂ ಆಗದಿದ್ದರೆ ಅವರಿಗೆ ಇದೊಂದು ಮೋಸದ ತಾಣ ಎಂಬ ಭಾವನೆ ಬೆಳೆಯುತ್ತದೆ. ಆದರೆ ಶ್ರೀಧರರ ಪ್ರಕಾರ "ಸನ್ನಡತೆ ಸದ್ಬುದ್ದಿ ಸದಾಚಾರ ನಮ್ಮಲ್ಲಿ ಇದ್ದರೆ ಅದಕ್ಕೆ ಭಗವಂತ ಯೋಗ್ಯತೆಯನ್ನು ತಾನಾಗಿಯೇ ಕರುಣಿಸಬಲ್ಲ. ದುರಾಸೆ ದ್ವೇಷಕ್ಕೆ ಆತ ಮೌನಿ. ರೋಗರುಜಿನಗಳು, ಆರ್ಥಿಕ ಸಮಸ್ಯೆಗಳು, ಮುಂತಾದವುಗಳನ್ನು ತೀರ್ಥ ಪ್ರೋಕ್ಷಿಸಿ ಮಾಯ ಮಾಡಲಾಗದು. ನನ್ನ ಬಳಿ ಬರುವ ಭಕ್ತರು ತಮಗೆ ಹಣ ಕರುಣಿಸಿ, ನನ್ನ ಮನೆಯ ಆಕಳು ಹಾಲು ನೀಡುತ್ತಿಲ್ಲ, ನನಗೆ ಭೋಗ ಕರುಣಿಸಿ, ಎಂದು ಬರುತ್ತಾರೆ. ಆದರೆ ನಾನು ಸನ್ಯಾಸಿ ನನ್ನ ಬಳಿ ಮುಕ್ತಿಕೊಡಿ ಎಂದು ಪ್ರಾಂಜಲ ಮನಸ್ಸಿನಿಂದ ಇಲ್ಲಿಯವರೆಗೆ ಯಾರೂ ಬಂದಿಲ್ಲ. ನನ್ನ ತಪೋಶಕ್ತಿ ನನಗೆ ಮುಕ್ತಿ ನೀಡಬಹುದು ಆದರೆ ಮಿಕ್ಕವರ ವೈಯಕ್ತಿಕ ಸಮಸ್ಯೆಗೆ ಅವರೂ ಸನ್ಮಾರ್ಗದಲ್ಲಿ ನಡೆಯಬೇಕು. ನನ್ನಿಂದ ಪವಾಡಗಳು ನಡೆಯುವುದಿಲ್ಲ." ಎಂದು ಹೇಳುತ್ತಿದ್ದರಂತೆ. ಹಾಗೂ ಪ್ರಾಮಾಣಿಕ ಮನಸ್ಸಿನಿಂದ ಪ್ರಾರ್ಥಿಸುವ ಭಕ್ತರಿಗೆ ಮಾನಸಿಕ ಧೈರ್ಯ ತುಂಬುತ್ತಿದ್ದರಂತೆ. ಸಾತ್ವಿಕ ರೀತಿಯಲ್ಲಿ ಬದುಕುವ ದಾರಿಯನ್ನು ಉಪನ್ಯಾಸಗಳ ಮುಖಾಂತರ ಬೋಧಿಸುತ್ತಿದ್ದರಂತೆ. ಹೀಗಾಗಿ ಅವರು ಮುಕ್ತರಾದನಂತರವೂ ಕ್ಷೇತ್ರ ಅವರ ಸನ್ಮಾರ್ಗದಲ್ಲಿ ನಡೆಯುತ್ತಿತ್ತು. ಅಂದು ಶ್ರೀಧರರು ಅದೆಷ್ಟು ಸಜ್ಜನರಾಗಿದರು ಎನ್ನುವುದಕ್ಕೆ ಅವರಬಳಿ ಯಾರಾದರೂ ಗಂಡುಹೆಣ್ಣಿನ ಜಾತಕ ತೋರಿಸಿ "ಮದುವೆ ಮಾಡಿಕೊಳ್ಳಬಹುದಾ... " ಎಂದು ಕೇಳಿದರೆ. "ತಮ್ಮಾ ಜಾತಕ ನಿನ್ನ ಪುರೋಹಿತರಿಗೆ ತೋರಿಸು, ಅದು ಅವರ ಕೆಲಸ, ಒಳ್ಳೆಯ ಕೆಲಸಕ್ಕೆ ಭಗವಂತನ ಆಶೀರ್ವಾದ ಇದೆ" ಎನ್ನುತ್ತಿದ್ದ್ರಂತೆ. ಅವರು ಭವಿಷ್ಯ, ಜಾತಕ ಮುಂತಾದವುಗಳ ತಂಟೆಗೆ ಹೋದವರಲ್ಲ ಎಂದು ಅವರನ್ನು ಹತ್ತಿರದಿಂದ ನೋಡಿದ ಶಿಷ್ಯರೊಬ್ಬರು ಹೇಳಿದರು. ಈಗ ಮಾದ್ಯಮದವರ ಅತಿಮಾನುಷ ಪ್ರಚಾರದಿಂದ ವರದಹಳ್ಳಿಯನ್ನು ಮಾಂತ್ರಿಕ ಶಕ್ತಿಯ ತಾಣ ಮಾಡುವ ಯತ್ನ ನಡೆದಿದೆ. ಪವಾಡಗಳ ತಾಣವಾಗುವತ್ತ ಹೆಜ್ಜೆ ಹಾಕಿದೆ. ಇದರಿಂದಾಗಿ ನೆಮ್ಮದಿಯ ತಾಣವಾಗಿದ್ದ ಕ್ಷೇತ್ರ ವ್ಯಾಪಾರೀಕರಣದ ಪೇಟೆಯಾಗುವ ದಿನ ದೂರವಿಲ್ಲ. ಆದರೆ ಟಿವಿಯಲ್ಲಿ ನ ವರದಿಯಲ್ಲಿ ಶ್ರೀಧರರ ಆಶ್ರಮದ ಆರಂಭದಿಂದಲೂ ಬೆಳವಣಿಗೆಗೆ ಕಾರಣೀಕರ್ತರಾದ ಶಂಕರನಾರಾಯಣ ರಾಯರಂತರ ನಿಜವಾದ ಭಕ್ತರ ಸಂದರ್ಶನ ಇಲ್ಲದಿರುವುದು ಅನುಮಾನ ಹುಟ್ಟಿಸುತ್ತದೆ. ಇದು ಪ್ರಚಾರಕ್ಕೆ ಮಾಡಿದ ತಂತ್ರವೇ? ಎಂಬ ಪ್ರಶ್ನೆ ಕಾಡದಿರದು. ಹಾಗೇನಾದರೂ ಪ್ರಚಾರಕ್ಕೆ ಮಾಡಿದ ತಂತ್ರವಾದರೆ ವರದಹಳ್ಳಿ ಮತ್ತೊಂದು ಕಮರ್ಶಿಯಲ್ ಕೇಂದ್ರವಾಗಲು ಹೆಚ್ಚುದಿನ ಬಾಕಿ ಇಲ್ಲ. ಶ್ರಿಧರರೇ ಕಾಯಬೇಕು ಕ್ಷೇತ್ರವನ್ನು....!

ನಮಃ ಶಾಂತಾಯ ದಿವ್ಯಾಯ ಸತ್ಯ ಧರ್ಮ ಸ್ವರೂಪಿಣೆ ,ಸ್ವಾನಂದಾಮೃತ ತೃಪ್ತಾಯ ಶ್ರೀಧರಾಯ ನಮೋ ನಮ:

ಎಂಬ ಮಂತ್ರ ಬಾಲ್ಯದಿಂದಲೇ ಹೇಳುತ್ತಾ ಬಂದಿರುವ ಸಾವಿರಾರು ಭಕ್ತರಿಗೆ ಅದೊಂದೇ ಮಂತ್ರ ಸಾಕು ಶ್ರೀಧರರು ಎಂತಹ ಸನ್ಯಾಸಿ ಎಂದು ತಿಳಿಯಲು. ಆದರೆ ಇಂದಿನ ಜನ ಬಿಂಬಿಸಿಹೊರಟಿರುವ ಮಾಂತ್ರಿಕ ಶಕ್ತಿಯ ಶ್ರೀಧರರು ಅಲ್ಲಿ ಎಂದೂ ಇರಲಿಲ್ಲ ಇಂದೂ ಇಲ್ಲ ಮುಂದೂ ಇರುವುದಿಲ್ಲ ಎಂಬುದು ಹಿರಿಯರ ನುಡಿ. ನಂಬಿ ಕೆಟ್ಟವರಿಲ್ಲವೋ ನಿಜ. ಆದರೆ ಕೆಟ್ಟದ್ದನ್ನು ನಂಬಬಾರದು. ಹಾಗೆ ನಂಬಿದಲ್ಲಿ ಕೆಟ್ಟುಹೋಗುವುದು ಖಂಡಿತ...

ಕೊನೆಯದಾಗಿ :ನಮ್ಮ ಕಡೆ ಸಹಜವಾಗಿ ನಡೆಯುತ್ತಿರುವ ವಿಷಯಗಳನ್ನು ದೊಡ್ಡದು ಮಾಡುವ ಕೆಲಸಕ್ಕೆ ಕಡ್ಡಿ (ಫಿಟ್ಟಿಂಗ್) ಇಡುವುದು ಅನ್ನುತ್ತಾರೆ. ಟಿ.ವಿ ನೈನ್ ಗೆ ಕಡ್ಡಿಚಾನೆಲ್ ಎಂಬ ಹೆಸರು ಇತ್ತೀಚೆಗೆ ಹರಿದಾಡುತ್ತಿದೆ. ಸಣ್ಣದ್ದನ್ನು ದೊಡ್ಡದ್ದು, ಇಲ್ಲದ್ದನ್ನು ಇದ್ದಂತೆ ಮಾಡುವುದು ಅವರ ವೃತ್ತಿ. ಆದರೆ ಅಮಾಯಕರು ಸಿಕ್ಕಿಹಾಕಿಕೊಳ್ಳುವುದು ಯಾರ ವೃತ್ತಿಯೋ ಅರ್ಥವಾಗುತ್ತಿಲ್ಲ. ಪ್ರಪಂಚ ಇದು ಅವರವರ ದೃಷ್ಟಿಯಲ್ಲಿ ಅವರವರು ಸರಿ.

ಅಂತಿಮವಾಗಿ: ನಾನು ಈ ಬ್ಲಾಗ್ ಬರೆದು ಮುಗಿಸುತ್ತಿದ್ದಂತೆ ಕಡ್ಡಿ ತಂಡ ರಾಮನಗರದ ದರ್ಗಾದಲ್ಲಿ ದಿವ್ಯ ಪುರುಷ, ಕೇಳಿದ್ದನ್ನು ನೀಡುತ್ತಾನೆ, ಮಕ್ಕಳಿಲ್ಲದವರಿಗೆ ಮಕ್ಕಳು, ಹಣವಿಲ್ಲದವರಿಗೆ ಹಣ, ಎಂದು ಮನುಷ್ಯರು ಎಂದೂ ಮಾಡದ ಚೇಷ್ಟೆಗಳನ್ನು ಮಾಡುತ್ತಾ ಕೈ ಆಡಿಸುತ್ತಾ ಆಳವಾದ ದನಿಯಲ್ಲಿ ಕೂಗುತ್ತಿವೆ. ಆ ದೇವರೆ ............ ನಮ್ಮ ಜನರನ್ನು . ಕಾಪಾಡಬೇಕು

ನಾನು ಮತ್ತು ಕನ್ನಡ ಮತ್ತು ಹಳ್ಳಿ ಮತ್ತು ದುಡ್ಡು.......

ನಾನು ಕನ್ನಡಾಭಿಮಾನಿಯಾಗಲು ಮುಖ್ಯ ಕಾರಣ ಇಂಗ್ಲೀಷ್ ಬಾರದಿರುವುದು. ಬೀಚಿಯವರ ತಿಮ್ಮನಂತೆ ನನಗೆ ಇಂಗ್ಲೀಷ್ ಕಹಿ. ಆತನಿಗೂ ಅದೇ ಸಮಸ್ಯೆ ಯಂತೆ. ಪಿ ಯು ಟಿ ಎಂದರೆ ಪುಟ್ ಸರಿ ಆದರೆ ಸಿ ಯು ಟಿ ಕುಟ್ ಆಗಬೇಕಿತ್ತು ಅದೇಗೆ ಕಟ್ ಆಯಿತು? ಎಂಬ ಪ್ರಶ್ನೆ ಕಾಡಿ ಅಂತಿಮದಲ್ಲಿ ಇಂಗ್ಲೀಷ್ ಭಾಷೆಯೇ ಸರಿ ಇಲ್ಲ ಎಂಬ ತೀರ್ಮಾನಕ್ಕೆ ಬಂದಿದ್ದನಂತೆ.ನನಗೂ ಹಾಗೆಯೆ. ನನಗೆ ಇಂಗ್ಲೀಷ್ ಓದಿದ್ದು ಅರ್ಥವಾಗುತ್ತೆ. ದರಿದ್ರದ್ದು ಬರೆಯಲು ಬರುವುದಿಲ್ಲ ಮತ್ತು ಮಾತನಾಡಲು ಹೆದರಿಕೆ. ನಿಜವಾದ ಕನ್ನಡಾಭಿಮಾನಿಗಳೆಂದರೆ ಬಾಳೆಹೊಳೆ ಪೆಜತ್ತಾಯ, ಅಮೆರಿಕಾದಿಂದ ಬರೆಯುವ ಶ್ರೀವತ್ಸ್ ಜೋಷಿ, ಅಮೇರಿಕಾದ

ತುತ್ತೂರಿ ಎಂಬ ಪತ್ರಿಕೆಯ ಮೂಲಕ ಕನ್ನಡ ಕಲಿಸುತ್ತಿರುವ ವಿಶ್ವೇಶ್ವರ ದೀಕ್ಷಿತ್, ದಟ್ಸ್ ಕನ್ನಡದ ಶ್ಯಾಮ್ ಹಾಗೂ ಇಂಗ್ಲೀಷ್ ಚೆನ್ನಾಗಿ ಗೊತ್ತಿದ್ದೂ ಕನ್ನಡದಲ್ಲಿ ಬ್ಲಾಗ್ ಬರೆಯುವ ಶುಶ್ರುತ ದೊಡ್ದೇರಿ, ಚೈತ್ರರಶ್ಮಿಯ ಸಂಪಾದಕ ರಾಮಚಂದ್ರ ಹೆಗಡೆ, ಯಂತಹ ನೂರಾರು ಜನ. ಅವರಿಗೆಲ್ಲಾ ಚಕಚಕನೆ ಮಾತನಾಡಲು ಇಂಗ್ಲೀಷ್ ಬರುತ್ತದೆ. ಪಟಪಟನೆ ಬರೆಯಲು ಆಂಗ್ಲ ಭಾಷೆ ಬರುತ್ತದೆ. ಆರ್ಥಿಕ ಲಾಭಕ್ಕಾಗಿ ಕನ್ನಡವನ್ನು ಅವಲಂಬಿಸಬೇಕಾದ ದರ್ದು ಇಲ್ಲ. ಆದರೂ ತಮ್ಮ ಸಮಯವನ್ನು ಕನ್ನಡಕ್ಕಾಗಿ ,ಮೀಸಲಿಟ್ಟಿದ್ದಾರೆ.

ನಾನು ಹಳ್ಳಿಯ ಅಭಿಮಾನಿಯಾಗಲು ಮುಖ್ಯ ಕಾರಣ ಪೇಟೆಯಲ್ಲಿ ಇರಲು ಅವಕಾಶವಿಲ್ಲದಿರುವುದು. ಕೆಸರು ಕೆಸರು ರಸ್ತೆ, ಜಟಿ ಜಟಿ ಮಳೆ, ಪದೆ ಪದೆ ಕೈಕೊಡುವ ಕರೆಂಟು, ರಸ್ತೆಯಿಂದ ಶುರುವಾಗಿ ಟೆಲಿಪೋನ್ ದುರಸ್ತಿಯವರೆಗೂ ತೆರಿಗೆ ಕಟ್ಟುವ ನಾವೇ ಒದ್ದಾಡಬೇಕಾದ ಪರಿಸ್ಥಿತಿ. ಒಂದು ಸಾಸಿವೆ ಕಾಳು ಬೇಕಾದರೂ ೬ ಕಿಲೋಮೀಟರ್ ದೂರಕ್ಕೆ ಓಡಬೇಕಾದ ಸ್ಥಿತಿ. ವರ್ಷದಲ್ಲಿ ಒಂಬತ್ತು ತಿಂಗಳು ಖಾಲಿ ಜೇಬು. ಯಾರಿಗೆ ಬೇಕು ಅನ್ನಿಸಿಬಿಡುತ್ತದೆ. ಓದುವ ಕಾಲದಲ್ಲಿ ಓದಿಕೊಂಡಿದ್ದರೆ ಪಟ್ಟಣ ಸೇರಿ ಹಾಯಾಗಿ ಇರಬಹುದು ಎಂದು ಹಲವುಬಾರಿ ಅನ್ನಿಸಿಬಿಡುತ್ತದೆ. ಡಾಲರ್ ಅಥವಾ ಯೆನ್ ಅಥವಾ ರಿಯಾಲ್ ರೂಪದಲ್ಲಿ ಸಂಬಳ ಎಣಿಸಿ ಅದನ್ನು ರೂಪಾಯಿಗೆ ಪರಿವರ್ತಿಸಿ ಖುಷಿ ಪಟ್ಟು ಹೊಂಡಾ ಅಥವಾ ಸುಜುಕಿ ಕಾರಿನಲ್ಲಿ ಖತ್ರೀನಾ ಕೈಫ್ ಕೆನ್ನೆಯಂತಹ ಟಾರ್ ರಸ್ತೆಯಲ್ಲಿ ಹೆಂಡತಿ ಮಗನನ್ನು ಕುಳ್ಳಿಸಿಕೊಂಡು ಝೊಂಯ್ಯನೆ ಹೋಗಬಹುದಿತ್ತು. ಆಗ ಮಗ ಇಂಗ್ಲೀಷಿನಲ್ಲಿ ಕೇಳುವ ಪ್ರಶ್ನೆಗೆ ಅವನ ಅಮ್ಮ ನೀಡುವ ಉತ್ತರ ಸರಿಯಾಗದೆ ನಾನು ಪಟಪಟನೆ ಉತ್ತರಿಸಬಹುದಿತ್ತು ಅಂತ ಅನ್ನಿಸುತ್ತದೆ. ಅಲ್ಲಿನ ಅನುಭವವನ್ನು ಕನ್ನಡ ಪತ್ರಿಕೆಗೋ ಅಥವಾ ಬ್ಲಾಗ್ ಬರೆದಿದ್ದರೆ "ಅಂವ ಅಮೆರಿಕಾದಲ್ಲಿದ್ದರೂ ಕನ್ನಡದ ಮೇಲೆ ಎಷ್ಟೊಂದು ಅಭಿಮಾನ ನೋಡು ಅಂತ ಅನ್ನಿಸಿಕೊಳ್ಳಬಹುದಿತ್ತು. ಈ ಪಟ್ಟಣದ ಲೈಫ್ ಎಂದರೆ ಯಾಂತ್ರೀಕೃತ ಬದುಕು, ಇಲ್ಲಿ ಏಕತಾನತೆ, ಹಳ್ಳಿಯಲ್ಲಾದರೆ ಸೊಗ ಡಿದೆ ಎಂಬಂತಹ ಬೊಗಳೆ ಭಾಷಣ ಪಟ್ಟಣದಲ್ಲಿ ಕುಳಿತು ಮಾಡಬಹುದಿತ್ತು. ಹಳ್ಳಿಯ, ರೈತರ ಜ್ವಲಂತ ಸಮಸ್ಯೆಯ ಕುರಿತು ಸಂಜೆ ಹೊತ್ತಿನಲ್ಲಿ ಚರ್ಚೆ ಮಾಡಬಹುದಿತ್ತು. ಇರಲಿ

ನನಗೆ ಹಣವೆಂದರೆ ಒಂಥರಾ ಅಲರ್ಜಿಯಾಗಲು ಮುಖ್ಯ ಕಾರಣ ನನ್ನಬಳಿ ಹಣವಿಲ್ಲದಿರುವುದು. ಹಾಗಾಗಿ ಶ್ರೀಮಂತಿಕೆ ಇದ್ದರೆ ಸುಖವಿಲ್ಲ, ಬಡತನದಲ್ಲಿ ಆನಂದವಿದೆ ಎನ್ನುವ ಭಾಷಣ ಮಾಡುವುದನ್ನು ಅಭ್ಯಾಸ ಮಾಡಿದ್ದೇನೆ. ವರ್ಷಕ್ಕೆ ಒಂದೂ ಕಾಲು ಕೋಟಿ ರೂಪಾಯಿ ಸಂಬಳ ವೇಣುವಿಗಂತೆ ಎಂಬ ಸುದ್ದಿ ,ಹಾಗೂ ನಾನು ಎತ್ತಿ ಆಡಿಸಿದ ರಮ್ಯಾ "ಮಾವ ಎನ್ನ ಸಂಬಳ ವರ್ಷಕ್ಕೆ ಐದು ಲಕ್ಷ" ಎಂದಾಗ, ನನ್ನ ಕ್ಲಾಸ್ಮೇಟ್ ರಾಜೇಶನ ಮನೆಯ ವ್ಯಾಲ್ಯೂ ಒಂದು ಕೋಟಿಯಂತೆ ಎಂದಾಗ, ಅಬ್ಬಬ್ಬ ಅನ್ನಿಸುತ್ತದೆ. ಇಡೀ ವರ್ಷಕ್ಕೆ ಒಂದು ಲಕ್ಷವನ್ನೂ ಎಣಿಸಲಾಗದ ನಾನು ಹಣ ಅಂತಹ ಮಹತ್ವ ಅಲ್ಲ ಎನ್ನುತ್ತೇನೆ. ಅಮೆರಿಕಾದಲ್ಲಿಯೋ, ದುಬೈ ನಲ್ಲಿಯೋ, ಬೆಂಗಳೂರಿನಲ್ಲಿಯೋ ಇರುವ ನನ್ನ ಪರಿಚಯದವರಿಗೆ ಕೋಟಿಗಟ್ಟಲೆ ಆಸ್ತಿ ಎಂದಾಗ ಅಮ್ಮಾ ಎನ್ನುವ ಉದ್ಗಾರ ತೆಗೆಯುತ್ತೇನೆ. ಹಾಗಂತ ನಾನೂ ಹಣ ಸಂಪಾದಿಸಲು ಬಹಳ ಒದ್ದಾಡಿದ್ದೇನೆ. ಅದು ನನ್ನ ಕೈಯಲ್ಲಿ ಆಗದ ಕೆಲಸ ಎಂದು ಸುಸ್ತಾಗಿ ಸುಮ್ಮನುಳಿದಿದ್ದೇನೆ. ಆವಾಗಲೇ ಶುರುವಾಗಿದ್ದು ಬ್ಲಾಗ್ ಬರೆಯುವುದು, ಕಟ್ಟೆ ಪತ್ರಿಕೆ ನಡೆಸುವುದು, ಅರಣ್ಯ ಬೆಳೆಸುವುದು, ಮುಂತಾದ ಕೆಲಸವಿಲ್ಲದ ಕೆಲಸಗಳು. ಹಾಗೂ ಪರಿಚಯದ ನೂರೈವತ್ತು ಜನರಿಗೆ ಅದರ ಲಿಂಕ್ ಮೈಲ್ ಮಾಡುವುದು. ಜನ ಓದುತ್ತಾರೆ ಅಂದುಕೊಳ್ಳುವುದು. (ಕಳುಹಿಸಿದ ಲಿಂಕ್ ಬಹಳಷ್ಟು ಜನರ ಮೈಲ್ ಬಾಕ್ಸಿನಲ್ಲಿ ಡಿಲೀಟ್ ಅಗುತ್ತದೆಯೆಂದು ಗೊತ್ತಿದ್ದರೂ). ಹೀಗೆ ನಡೆಯುತ್ತಿದೆ ಜೀವನ.

ಮಕ್ಕಳಿಗಾದರೂ ಇಂಗ್ಲೀಷ್ ಕಲಿಸಿ ಹೊರಗಡೆ ಅಟ್ಟೋಣ ಅಂದುಕೊಂಡರೆ , ಅವರ ಬಾಯಲ್ಲಿ ಟಸ್ ಪುಸ್ ಅಂತ ಇಂಗ್ಲೀಷ್ ನಲ್ಲಿ ಮಾತನಾಡಿಸೋಣ ಅಂದರೂ ಇಲ್ಲಿ ಆಗುತ್ತಿಲ್ಲ, ಅಲ್ಲಿ ಅವಕಾಶವಿಲ್ಲ ಹಾಗಾಗಿ ಇದೇ ಸೂಪರ್ ಇದೇ ಸೃಜನಶೀಲತೆ ಮತ್ತು ಇದೇ ಸ್ವರ್ಗ. ಮತ್ತು ಇದೇ ಜೀವನ.