ದೂರದ ಬೆಟ್ಟ.....

ಈ ವರ್ಷ ಅದೇಕೋ ಜೇನು ಮುನಿಸಿಕೊಂಡಿದೆ. ಕಳೆದವರ್ಷ ಇಪ್ಪತ್ತೈದು ಕೆಜಿ ತುಪ್ಪ ಈ ವರ್ಷ ಕೇವಲ ಅಂದರೆ ಕೇವಲ ಇನ್ನೂರಾ ಐವತ್ತು ಗ್ರಾಂ. ಪದೆ ಪದೆ ಮಳೆ ಬಂದದ್ದಕ್ಕೋ ಅಥವಾ ಕಾಡು ಮುನಿಸಿಕೊಂಡಿದ್ದಕ್ಕೋ ಗೊತ್ತಿಲ್ಲ ನನಗೆ ಜೇನು ತುಪ್ಪ ಸಿಗಲಿಲ್ಲ. ಇರಲಿ ಈ ಪ್ರಕೃತಿ ನಂಬಿದ ಬದುಕೇ ಹೀಗೆ.

ನಮ್ಮ ಮನೆಯಲ್ಲಿನ ಜೇನುಗೂಡು ನೋಡಿದವರು ಕೇಳುವ ಪ್ರಶ್ನೆ "ವರ್ಷಕ್ಕೆ ಎಷ್ಟು ಜೇನು ತುಪ್ಪ ಸಿಗುತ್ತದೆ?" . ಕಳೆದ ವರ್ಷ ನಾನು " ಪೆಟ್ಟಿಗೆಯೊಂದಕ್ಕೆ ಇಪ್ಪತ್ತೈದು ಕೆಜಿ" ಎಂದು ಒಂಥರಾ ಹೆಮ್ಮೆಯಿಂದ ಹೇಳುತ್ತಿದ್ದೆ. ಆವಾಗ ಅವರ ಮನಸ್ಸು ಏಕ್ ದಂ ಲೆಕ್ಕಾಚಾರಕ್ಕೆ ಇಳಿಯುತ್ತಿತ್ತು. ಇಪ್ಪತ್ತೈದು ಇಂಟು ಇನ್ನೂರು ಅಲ್ಲಿಗೆ ಬರೊಬ್ಬರಿ ಐದು ಸಾವಿರ ರೂಪಾಯಿ. ವಾವ್ ಸೂಪರ್ ಇನ್ ಕಂ ಎಂದು ಮನಸ್ಸಿನಲ್ಲಿ ಸಂತೋಷಗೊಂಡು ತಾವೂ ಆ ಆದಾಯ ಗಳಿಸುವ ಲೆಕ್ಕಾಚಾರದಲ್ಲಿ ಮುಳುಗುತ್ತಿದ್ದರು. ತಮ್ಮನೆ ಅಪ್ಪಿ ಏನೂ ಉಪಯೋಗಕ್ಕೆ ಬಾರದವನು ಎಂದು ಗೊಣಗುತ್ತಿದ್ದರು. ಒಂದು ಪೆಟ್ಟಿಗೆಗೆ ಐದು ಸಾವಿರ ಅಂದರೆ ಐದು ಪೆಟ್ಟಿಗೆಗೆ ಪುಕ್ಕಟ್ಟೆ ಇಪ್ಪತ್ತೈದು ಸಾವಿರ ಬಂತಲ್ಲೋ ಅಂತ ಒಂಥರಾ ಒಳವೇದನೆಯಿಂದ ಹೇಳುತ್ತಿದ್ದರು. ಆದರೆ ಅವೆಲ್ಲಾ ಗಣಿತವಲ್ಲ ಅಂತ ಅವರಿಗೆ ಗೊತ್ತಿಲ್ಲ ನಾನೂ ಬಾಯ್ಬಿಟ್ಟು ಹೇಳುತ್ತಿರಲಿಲ್ಲ.

ಆದರೆ ಈ ವರ್ಷ ಅಕ್ಷರಶ: ಇನಕಂ ಜೀರೋ. ಅವಕ್ಕೂ ರಿಸಿಷನ್ ಪಿರೀಯಡ್ ಇರಬಹುದೇನೋ..?.

ಆದರೆ ನಾನು ಮಾತ್ರಾ ನಮ್ಮ ಮನೆಗೆ ಬಂದವರು ಜೇನು ಪೆಟ್ಟಿಗೆಯ ಬಳಿ ನಿಂದು ವರ್ಷಕ್ಕೆ ಎಷ್ಟು? ಎಂಬ ಪ್ರಶ್ನೆ ಕೇಳಿದಾಗ ಅದೇ ಹಳೇ ಹೋದ್ವರ್ಷದ ಉತ್ತರವನ್ನೇ "ಇಪ್ಪತ್ತೈದು ಕೆಜಿ " ಎಂದು ಹೇಳುತ್ತಿದ್ದೇನೆ. ಆಫೀಸಿನಲ್ಲಿ ಬೆಂಚ್ ನಲ್ಲಿ ಕೂರಿಸಿದರೂ ಮನೆಯಲ್ಲಿ ಹಾಗೂ ಸಂಬಂಧಿಕರ ನಡುವೆ "ನನಗೇನೂ ತೊಂದರೆಯಿಲ್ಲ. ನನ್ನ ಪ್ರೆಂಡ್ ನ ಪ್ರೆಂಡ್ ಕಂಪನಿಯಲ್ಲಿ ನೂರು ಜನರನ್ನು ತೆಗೆದರಂತೆ" ಎನ್ನುವ ಕತೆಯ ಹಾಗೆ.